ସମାଜ ଡିଜିଟାଲ ଡେସ୍କ: କାର୍ଯ୍ୟବନ୍ଦ ଆନ୍ଦୋଳନରେ ନର୍ସିଂ କର୍ମଚାରୀ ସଂଘ। ଶୁକ୍ରବାରଠାରୁ ରାଜ୍ୟବ୍ୟାପୀ ନର୍ସିଂ କର୍ମଚାରୀ ସମସ୍ତ ମେଡିକାଲ ସେବା ଉପରେ ରୋକ ଲଗାଇଛନ୍ତି। ୧୦ ଦଫା ଦାବି ନେଇ ଆନ୍ଦୋଳନକୁ ଜାରି ରଖିଛନ୍ତି ସମସ୍ତ ନର୍ସିଂ କର୍ମଚାରୀ। ଏହାକୁ ନେଇ କଟକ ଏସସିବି ମେଡିକାଲରେ ପ୍ରଭାବିତ ହୋଇଛି ରୋଗୀସେବା। ଜରୁରୀକାଳୀନ ସେବା ବନ୍ଦ କରିବା ପରେ ଏସସିବିର ସମସ୍ତ ବିଭାଗରେ ବ୍ୟାହତ ହୋଇଛି ରୋଗୀ ସେବା।
ଏହି ବିବାଦକୁ ନେଇ ରାଜ୍ୟ ସରକାରଙ୍କ ସହ ଆଲୋଚନା ବିଫଳ ହେବାପରେ ନର୍ସିଂ କର୍ମଚାରୀ ଆନ୍ଦୋଳନକୁ ତୀବ୍ରତର କରିଛନ୍ତି। ରାଜ୍ୟ ନର୍ସିଂ ସଂଘ ସମ୍ପାଦିକାଙ୍କ ମତରେ ରାଜ୍ୟ ସରକାର ନର୍ସମାନଙ୍କୁ ଅଣଦେଖା କରୁଛନ୍ତି। ଏସମା ଲଗାଇ ସରକାର ଯେଉଁ ଡରାଇବା ପାଇଁ ଚେଷ୍ଟା କରୁଛନ୍ତି, ସେଥିରେ ଆମ ସଂଘର ଯେତିକି କ୍ଷତି ହେବ ତା’ଠାରୁ ରୋଗୀସେବା ଅଧିକ ପ୍ରଭାବିତ ହେଉଛି। ଘଟଣାରେ ଏକ ଉଚ୍ଚସ୍ତରୀୟ କମିଟି ଗଠନ ହେଉ।
ସବୁ ଦିଗକୁ ନଜର ରଖି ନିଷ୍ପତ୍ତି ନିଆଯାଉ। ଏସମା ଲଗାଇଲେ ଆମେ ଦଣ୍ଡ ଭୋଗିବୁ ହେଲେ ରୋଗୀ ମଧ୍ୟ ଅନେକ ମାତ୍ରାରେ ପ୍ରଭାବିତ ହେବେ ବୋଲି ଆଜି ମଧ୍ୟ ଚେତାବନୀ ଦେଇଛନ୍ତି ସଂଘ ସମ୍ପାଦିକା। ଏହାବ୍ୟତୀତ ଆଉଟସୋର୍ସିଂ କର୍ମଚାରୀଙ୍କୁ ଧଳା ପୋଷାକ ପିନ୍ଧାଇ ନର୍ସ ଭାବରେ ଡ୍ୟୁଟି କରାଇବା ଗ୍ରହଣୀୟ ନୁହେଁ ବୋଲି କହିଛନ୍ତି ସଂଘ କର୍ମକର୍ତା। ଅନ୍ୟପଟେ ରୋଗୀ ସେବା ସମ୍ପୂର୍ଣ୍ଣ ରୂପେ ବାଧାପ୍ରାପ୍ତ ହୋଇଛି।
