କେସିଙ୍ଗା,୧।୧୧: କଳାହାଣ୍ଡି କେସିଙ୍ଗା ବ୍ଲକ ଅଧ୍ୟକ୍ଷ ଚନ୍ଦନ କୁମାର ସେନାପତିଙ୍କ ବିରୁଦ୍ଧରେ ଆସିଥିବା ଅନାସ୍ଥା ପ୍ରସ୍ତାବ ତାରିଖ ଧାର୍ଯ୍ୟ ହେଲା । ହେଲେ ନିର୍ବାଚନ ଅଧିକାରୀ ଏହି ସମୟରେ ଉପସ୍ଥିତ ନଥିଲେ । ଅନାସ୍ଥା ଆଣିଥିବା ବ୍ଲକ ଉପାଧ୍ୟକ୍ଷା ରାଜଲକ୍ଷ୍ମୀ ପଟ୍ଟନାୟକଙ୍କ ସହ ତାଙ୍କର ୩୫ ଜଣ ସମର୍ଥକ ବ୍ଲକ ପରିସରରେ ଠିକଣା ସମୟରେ ପହଞ୍ଚିଥିଲେ ।
ନୋଟିସ୍ ଅନୁଯାୟୀ, ବୈଠକ ସମୟ ୧୧ଟା ଥିବାବେଳେ କୋରମ୍ ହେଲେ ୧୨ଟା ୩୦ରେ ଭୋଟ୍ ହେବ ବୋଲି ଧାର୍ଯ୍ୟ କରିଥିଲେ । ହେଲେ ଶୁକ୍ରବାର ଅନାସ୍ଥା ପ୍ରସ୍ତାବ ପାଇଁ ନିର୍ବାଚନ ଅଧିକାରୀ ଭାବରେ ନିଯୁକ୍ତି ହୋଇଥିବା ଭବାନୀପାଟଣା ଅତିରିକ୍ତ ଉପଜିଲ୍ଲାପାଳ ଜୟଦେବ ଦାସଙ୍କ ଅନୁପସ୍ଥିତି ଯୋଗୁଁ ଅନାସ୍ଥା ପ୍ରସ୍ତାବ ବୈଠକ ହୋଇନପାରି ସ୍ଥଗିତ କରାଯାଇଛି । ଅପରପକ୍ଷରେ, ବ୍ଲକ ଅଧ୍ୟକ୍ଷ ଚନ୍ଦନ ସେନାପତିଙ୍କ ସମର୍ଥକ ବି ବୈଠକକୁ ଆସିନଥିଲେ । ଗେମ୍ ଚେଞ୍ଜର ହୋଇ ପଡ଼ିଥିବା କଳାହାଣ୍ଡି ଲୋକସଭା ସାଂସଦ ମାଳବିକା କେଶରୀ ଦେଓ ମଧ୍ୟ ଅନାସ୍ଥା ପ୍ରସ୍ତାବ ବୈଠକରେ ଅନୁପସ୍ଥିତ ରହିଲେ । ଅନାସ୍ଥା ପ୍ରସ୍ତାବରେ ମଙ୍ଗ ଧରିଥିବା ନର୍ଲା ବିଧାୟକ ମନୋରମା ମହାନ୍ତି ଖୋଦ୍ ଏହି ଅନାସ୍ଥା ପାଇଁ ବ୍ଲକ କାର୍ଯ୍ୟାଳୟରେ ବସିଥିଲେ ବି କେଉଁ ଅଧିକାରୀ ଆସିନଥିଲେ । ଅନାସ୍ଥା ପ୍ରସ୍ତାବ ପାଇଁ ପ୍ରସ୍ତୁତ ହୋଇ ଆସିଥିବା ସରପଞ୍ଚ ଓ ସମିତି ସଭ୍ୟମାନେ ନିରାଶ ହୋଇଥିଲେ । ଏବେ ୬ ଗୋଟି ସରପଞ୍ଚଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ ଆଗତ ହୋଇଥିବାରୁ ଆଗକୁ କିଛି ବି ହୋଇପାରେ । ଅନାସ୍ଥା ହେବ କି ନାହିଁ ବୋଲି ସନ୍ଦେହ ସୃଷ୍ଟି ହୋଇଛି । ପରେ ନିର୍ବାଚନ ଅଧିକାରୀଙ୍କ ସ୍ତ୍ରୀଙ୍କ ଦେହ ଅସୁସ୍ଥ ଥିବାବେଳେ ସେ ହସ୍ପିଟାଲରେ ଥିବାରୁ ସେ ଉପସ୍ଥିତ ନ ଥିବା ମାଜିଷ୍ଟ୍ରେଟ୍ ଦାଇତ୍ୱରେ ଥିବା କେସିଙ୍ଗା ତହସିଲଦାର ପ୍ରଶାନ୍ତି ପ୍ରଧାନ ପ୍ରକାଶ କରିଛନ୍ତି ।
