ବେଳେବେଳେ କଠିନ ପରିସ୍ଥିତିରେ ମଣିଷ ଏମିତି କିଛି କରେ, ଯାହାକୁ ସାମାନ୍ୟ ଅବସ୍ଥାରେ ମଧ୍ୟ ଭାବି ହୁଏନାହିଁ । ସେହି ସମୟରେ ମଣିଷ ଭିତରେ ଏକ ଅଲଗା ପ୍ରକାର ଶକ୍ତି ଏବଂ ସାହସ ଆସିଯାଏ, ଯାହା ଅସମ୍ଭବକୁ ମଧ୍ୟ ସମ୍ଭବ କରିପକାଏ । ଏମିତି କିଛି କଥାକୁ ସତ ପ୍ରମାଣିତ କରିଛି ଜଣେ ଝିଅ । ନିଜ ମା’ଙ୍କୁ ବଞ୍ଚାଇବା ପାଇଁ ଝିଅଟି ଯାହା କରିଛି, ତାହାକୁ ସହଜରେ କେହି ବିଶ୍ୱାସ କରିପାରିବେ ନାହିଁ ।
ଏଠାରେ ଅଟୋ ତଳେ ଚାପି ହୋଇଯାଇଥିବା ମା’ର ଜୀବନ ରକ୍ଷା କରିଛି ଝିଅ । ଅଟୋଟି ମହିଳାଙ୍କୁ ଧକ୍କା ଦେବା ପରେ ଓଲଟି ପଡ଼ିଥିଲା ଏବଂ ଏହା ତଳେ ମହିଳା ଜଣକ ଚାପି ହୋଇଯାଇଥିଲେ । ଦୁର୍ଘଟଣା ଘଟିବା କ୍ଷଣି ଝିଅଟି ଦୌଡ଼ି ଆସିଥିଲା ଏବଂ ଅଟୋରିକ୍ସା ଉଠାଇ ମା’ଙ୍କୁ ବଞ୍ଚାଇଥିଲା । ଏଥିରେ ଜଣେ ବ୍ୟକ୍ତି ତାଙ୍କୁ ସାହାଯ୍ୟ କରିଥିଲେ ।
ଘଟଣା ଘଟିଛି କର୍ଣ୍ଣାଟକ ମେଙ୍ଗାଲୁରୁର କିନ୍ନିଗୋଲିରେ । ଚେତନା ନାମ୍ନୀ ମହିଳା ଝିଅକୁ ଟ୍ୟୁସନରୁ ଆଣିବା ପାଇଁ ରାସ୍ତା ପାର୍ ହେଉଥିଲେ । ଏତିକି ବେଳେ ଏକ ଅଟୋ ତାଙ୍କୁ ଧକ୍କା ଦେଇଥିଲା । ଏହାପରେ ଅଟୋଟି ଭାରସାମ୍ୟ ହରାଇ ତାଙ୍କରି ଉପରେ ହିଁ ଓଲଟି ପଡ଼ିଥିଲା । ଫଳରେ ମହିଳା ଏହାତଳେ ଚାପି ହୋଇଯାଇଥିଲେ ।
ଦୁର୍ଘଟଣା ଦେଖି ଝିଅ ତୁରନ୍ତ ଦୌଡ଼ି ଆସିଥିଲା । ସେ ସାହସ ଓ ଶକ୍ତି ଜୁଟାଇ କିଛି ଲୋକଙ୍କ ସହାୟତାରେ ଅଟୋକୁ ଉଠାଇଥିଲା ଏବଂ ମା’ଙ୍କୁ ଉଦ୍ଧାର କରିଥିଲା । ମା’ଙ୍କୁ ବଞ୍ଚାଇବାର ପୂରା ଦୃଶ୍ୟ ସେଠାରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଛି, ଯାହାକୁ ଦେଖିବା ପରେ ସମସ୍ତେ ଝିଅର ସାହସକୁ ପ୍ରଶଂସା କରୁଛନ୍ତି ।
ଏହି ଦୁର୍ଘଟଣାରେ ଗୁରୁତର ଭାବେ ଆହତ ହୋଇଛନ୍ତି ଚେତନା । ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଏଥିରେ ଅଟୋ ଚାଳକ ଏବଂ ଅନ୍ୟ ଜଣେ ଯାତ୍ରୀଙ୍କୁ ମଧ୍ୟ ସାମାନ୍ୟ ଆଘାତ ଲାଗିଛି
