[ad_1]
ମୁରାଦାବାଦ: ପ୍ରିୟଙ୍କା ଗାନ୍ଧୀ ଭଦ୍ରା ଶନିବାର ଉତ୍ତରପ୍ରଦେଶର ମୁରାଦାବାଦରେ ରାହୁଲ ଗାନ୍ଧୀଙ୍କ ଭାରତ ଯୋଡ଼ୋ ନ୍ୟାୟ ଯାତ୍ରାରେ ଯୋଗ ଦେଇଥିଲେ। ତାଙ୍କ ଅନୁପସ୍ଥିତିକୁ ନେଇ ଭାଇ-ଭଉଣୀଙ୍କ ଭିତରେ ପଡ଼ୁନାହିଁ ବୋଲି ବିଜେପି ନେତାମାନେ ଅଭିଯୋଗ କରିଥିବା ବେଳେ ପ୍ରିୟଙ୍କା ଗାନ୍ଧୀ ସ୍ପଷ୍ଟ କରିଛନ୍ତି ଯେ ଅସୁସ୍ଥତା କାରଣରୁ ତାଙ୍କୁ ଡାକ୍ତରଖାନାରେ ଭର୍ତ୍ତି ହେବାକୁ ପଡ଼ିଥିଲା। ତେଣୁ ସେ ରାଜ୍ୟରେ ଯାତ୍ରାକୁ ସ୍ୱାଗତ କରିପାରି ନାହାନ୍ତି। ଶନିବାର ମୁରାଦାବାଦରୁ ଏଥିରେ ଯୋଗଦେବା ପରେ ତାଙ୍କ ଶ୍ୱଶୁରଘର ମୁରାଦାବାଦରେ ହୋଇଥିବାରୁ ଲୋକଙ୍କୁ ‘ଶ୍ବଶୁରାଲୱାଲୋଁ’ କହି ସମ୍ବୋଧନ କରି ସେ ନିଜର ଭାଷଣ ଆରମ୍ଭ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି, ମୁଁ ଏଠାକୁ ଆସି ବହୁତ ଖୁସି, କାରଣ ପ୍ରଥମ ଥର ପାଇଁ ମୁଁ ମୋ ଶାଶୂଘର ଲୋକଙ୍କ ସହ ଯାତ୍ରାରେ ଯୋଗ ଦେଉଛି। ଆପଣଙ୍କର ମନେ ଥିବ ଯେ ମୁଁ ଦୁଇବର୍ଷ ତଳେ ବିଧାନସଭା ନିର୍ବାଚନ ସମୟରେ ଏଠାରେ ଥିଲି। ତା’ପରେ ଆପଣ ବିଜେପି ସରକାରକୁ ନିର୍ବାଚିତ କଲେ, ଯୋଗୀ ଆଦିତ୍ୟନାଥଙ୍କୁ ମୁଖ୍ୟମନ୍ତ୍ରୀ କଲେ। ତେବେ ସେତେବେଳେ ଏବଂ ବର୍ତ୍ତମାନ ମଧ୍ୟରେ କ’ଣ ବଦଳିଛି? ପ୍ରଶ୍ନପତ୍ର ଲିକ୍ ପ୍ରସଙ୍ଗରେ ବିଜେପି ସରକାରଙ୍କୁ ଟାର୍ଗେଟ କରି ପ୍ରିୟଙ୍କା ଗାନ୍ଧୀ ଭଦ୍ରା ଏହି ପ୍ରଶ୍ନ କରିଥିଲେ। ସେ କହିଥିଲେ, ଗତକାଲି କୃଷକମାନେ ବିକ୍ଷୋଭ ପ୍ରଦର୍ଶନ କରିଥିଲେ। କୃଷକମାନେ ଆଜି ବି ଆନ୍ଦୋଳନ କରୁଛନ୍ତି କିନ୍ତୁ ସରକାର ସେମାନଙ୍କ କଥା ଶୁଣୁନାହାନ୍ତି। ଉତ୍ତରପ୍ରଦେଶରେ ଚାଷୀଙ୍କୁ ଜିପ୍ ତଳେ ମାଡ଼ିଥିବା, ମହିଳାଙ୍କୁ ନିର୍ଯାତନା ଦେଇଥିବା ଓ ପ୍ରଶ୍ନପତ୍ର ଲିକ୍ କରୁଥିବା ଲୋକଙ୍କ ଘରେ ବୁଲଡୋଜର ଚାଲି ନ ଥିଲା। ଏହି ସରକାରରେ ବୁଲଡୋଜର ଦୋଷୀଙ୍କ ଉପରେ ନୁହେଁ ବରଂ କେବଳ ନିରୀହ ଲୋକଙ୍କ ଘର ଉପରେ ଚାଲୁଛି ବୋଲି ପ୍ରିୟଙ୍କା କହିଛନ୍ତି। ଉତ୍ତରପ୍ରଦେଶରେ ସମାଜବାଦୀ ପାର୍ଟି ସହ ଆସନ ବୁଝାମଣା ଚୂଡ଼ାନ୍ତ କରିବାରେ ପ୍ରିୟଙ୍କା ଗାନ୍ଧୀ ପ୍ରମୁଖ ଭୂମିକା ଗ୍ରହଣ କରିଥିଲେ କାରଣ କଂଗ୍ରେସ ଏବେ ବାରାଣସୀ, ଆମେଥି ଏବଂ ରାଏବରେଲି ସମେତ ରାଜ୍ୟର ୧୭ଟି ଆସନରୁ ନିର୍ବାଚନ ଲଢ଼ିବ। ସୋନିଆ ଗାନ୍ଧୀ ତାଙ୍କ ରାୟବରେଲି ଆସନ ଖାଲି କରି ରାଜ୍ୟସଭାକୁ ଯିବା ପରେ ପ୍ରିୟଙ୍କା ସେଠାରୁ ନିର୍ବାଚନରେ ଲଢ଼ିବେ କି ନାହିଁ ତାକୁ ନେଇ କଳ୍ପନାଜଳ୍ପନା ଜୋର ଧରିଛି।
[ad_2]
