[ad_1]
ଚେନ୍ନାଇ: ତାମିଲ ଚଳଚ୍ଚିତ୍ର ଜଗତର ଖ୍ୟାତନାମା ଅଭିନେତା ଥାଲାପତି ବିଜୟ ଆଜି ରାଜନୀତିରେ ପାଦ ଥାପିବା ସହ ନୂତନ ରାଜନୈତିକ ଦଳ ଘୋଷଣା କରିଛନ୍ତି। ଏହି ନୂତନ ଦଳର ନାମ ‘ତାମିଝଗା ଭେତ୍ରି କାଝାଗମ୍’ (ଟିଭିକେ) ରଖାଯାଇଛି। ନିକଟରେ ଚେନ୍ନାଇରେ ବିଜୟଙ୍କ ପ୍ରଶଂସକଙ୍କ କ୍ଲବ ‘ବିଜୟ ମାକ୍କାଲ ଲାୟକମ୍’ର ବୈଠକ ବସିଥିଲା। ଏହି ବୈଠକରେ ନୂତନ ରାଜନୈତିକ ଦଳ ଗଠନ କରିବାକୁ ନିଷ୍ପତ୍ତି ଗ୍ରହଣ କରାଯାଇଥିଲା। ଏହି ବୈଠକ ପରେ ଆଜି ଅଭିନେତା ବିଜୟ ଏନେଇ ଘୋଷଣା କରିଛନ୍ତି । ସେ କହିଛନ୍ତି ଯେ ସେମାନେ ନିର୍ବାଚନ କମିସନରଙ୍କ ଠାରେ ତାମିଝଗା ଭେତ୍ରି କାଝାଗମ୍ ନାମକ ରାଜନୈତିକ ଦଳ ପଞ୍ଜୀକରଣ ପାଇଁ ଆବେଦନ କରିଛନ୍ତି। ୨୦୨୬ ରାଜ୍ୟ ବିଧାନସଭା ନିର୍ବାଚନରେ ଲଢ଼ି ଜିତିବା ଦଳର ଲକ୍ଷ୍ୟ ହେବ। ଏହା ସହ ସ୍ବଚ୍ଛ, ଦୁର୍ନୀତିମୁକ୍ତ ପ୍ରଶାସନ ସ୍ଥାପନ କରି ରାଜ୍ୟରେ ବଡ଼ ରାଜନୈତିକ ପରିବର୍ତ୍ତନ ପରିବର୍ତନ ଆଣିବା ଦଳର ଆଭିମୁଖ୍ୟ ହେବ। ରାଜନୀତି ତାଙ୍କ ପାଇଁ ଅନ୍ୟ ଏକ ପେଶା ନୁହେଁ, ଏହା ଲୋକଙ୍କ ପାଇଁ ପବିତ୍ର କାମ ବୋଲି ବିଜୟ କହିଛନ୍ତି। ଏଥିରେ ଏହି କାମରେ ସେ ସଂପୂର୍ଣ୍ଣ ନିଷ୍ଠାର ସହ ନିୟୋଜିତ ହେବେ ବୋଲି ବିଜୟ ପ୍ରତିଶ୍ରୁତି ଦେଇଛନ୍ତି। ନିର୍ବାଚନ କମିସନଙ୍କ ଠାରୁ ଅନୁମତି ମିଳିବା ପରେ ଦଳର ଚିହ୍ନ ଓ ପତାକା ପ୍ରସ୍ତୁତ କରାଯିବ। ୨୦୨୪ ନିର୍ବାଚନରେ ତାଙ୍କ ଦଳ ଭାଗ ନେବ ନାହିଁ କି କୌଣସି ଦଳକୁ ସମର୍ଥନ ଦେବନାହିଁ ବୋଲି ସେ ସ୍ପଷ୍ଟ କରିଛନ୍ତି।
[ad_2]
