ଗୋପାଳପୁର: ଗୋଳନ୍ଥରା ଥାନା ଅନ୍ତର୍ଗତ ମାର୍କଣ୍ଡି ମୁହାଣ ଅଞ୍ଚଳରେ ବସ୍ତା ବସ୍ତା ମଲା କୁକୁଡ଼ା ପଡ଼ି ରହିଥିବା ଦେଖିବାକୁ ମିଳିଛି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଛି। ଚାରିଆଡେ ବାର୍ଡ ଫ୍ଲୁ ନେଇ ଆତଙ୍କ ଖେଳି ଯାଇଥିବା ବେଳେ ହଠାତ୍ ସମୁଦ୍ର ମୁହାଣ ଅଞ୍ଚଳରେ ୮/୧୦ ବସ୍ତା ଭର୍ତ୍ତି ଶତାଧିକ ମଲା କୁକୁଡ଼ା ପାଣିରେ ଭାସମାନ ଅବସ୍ଥାରେ କୂଳରେ ଲାଗିଥିବା ଦେଖିବାକୁ ମିଳିଛି।
ଗ୍ରାମବାସୀଙ୍କ ପକ୍ଷରୁ ଘଟଣା ନେଇ ଶୁକ୍ରବାର ସନ୍ଧ୍ୟା ସୁଦ୍ଧା କୌଣସି ବିଭାଗକୁ ଅବଗତ କରାଇ ନଥିବା ବେଳେ କୁକୁଡ଼ା ଫାର୍ମ କରିଥିବା ମାଲିକ କୁକୁଡ଼ା ଗୁଡ଼ିକ ମରିଯିବା ପରେ ଘଟଣାକୁ ଚପାଇ ବାକୁ ଅଖାରେ ମଲା କୁକୁଡ଼ାକୁ ପୁରାଇ ନଦୀରେ ଫୋପାଡି ଦେଇଥିବା ଅଭିଯୋଗ କରିଛନ୍ତି। ମଲା କୁକୁଡ଼ା ଗୁଡ଼ିକ ମୁହାଣ ଅଞ୍ଚଳରେ ଭାସୁଥିବାରୁ ନଦୀର ପାଣି ଦୂଷିତ ହୋଇଥିବା ଲୋକମାନେ ଅଭିଯୋଗ କରିଛନ୍ତି। ତୁରନ୍ତ ବନ ବିଭାଗ କିମ୍ବା ମତ୍ସ୍ୟ ବିଭାଗ ଅଧିକାରୀମାନେ ଗାଁରେ ପହଞ୍ଚି ମୃତ କୁକୁଡ଼ା ଗୁଡ଼ିକୁ ବାହାର କରି ପୋତି ବାକୁ ଦାବି ହୋଇଛି।
