ବାଂଶପାଳ : ପାଳ ଭାଡ଼ି ତଳୁ ଉଦ୍ଧାର ହେଲା ନାବାଳକ । ମୁର୍ମୂଷୁ ଅବସ୍ଥାରେ ୧୨ ବର୍ଷର ନାବାଳକ ଉଦ୍ଧାର । କେନ୍ଦୁଝର ତେଲକୋଇ ଥାନା କରଦାଙ୍ଗି ଗାଁର ଏକ ପାଳ ଭାଡ଼ି ତଳୁ ନାବାଳକକୁ ଉଦ୍ଧାର କରାଯାଇଛି। ନାବାଳକକୁ ଅପହରଣ କରାଯାଇଥିବା ତେଲକୋଇ ଥାନାରେ ଅଭିଯୋଗ ହୋଇଥିଲା। ଉଦ୍ଧାର ବାଳକ ଜଣକ କରଦାଙ୍ଗି ଗାଁର ସଞ୍ଜୟ ପାତ୍ର ଓ ରିଙ୍କି ପାତ୍ରଙ୍କ ପୁଅ ଶାନ୍ତନୁ ପାତ୍ର ।
ବାଳକକୁ ଉଦ୍ଧାର କାରାଯାଇ ତେଲକୋଇ ମେଡ଼ିକାଲରେ ଭର୍ତ୍ତି କରାଯାଇଛି । ତେବେ ଏହି ଘଟଣାକୁ ନେଇ ତଦନ୍ତ ଚଳାଇଛି ପୋଲିସ ।
ସୂଚନା ଅନୁସାରେ ଗତ ୨୭ତାରିଖରେ ଶାନ୍ତନୁଙ୍କୁ ତାଙ୍କ ଗାଁର ରଶ୍ମି ପାତ୍ର ନାମକ ଜଣେ ମହିଳାଙ୍କ ପୁଅ ସଙ୍ଗେ ସାଙ୍ଗ ହୋଇ ଘରୁ ଟଙ୍କା ଚୋରି କରୁଥିବା ଅଭିଯୋଗ କରି ଅଟକ ରଖିଥିଲେ । ଶାନ୍ତନୁଙ୍କୁ ଅଟକ ରଖିବା ସହିତ ତାର ସାଇକେଲକୁ ମଧ୍ୟ ଅଟକ ରଖିଥିଲେ । ମହିଳା ଜଣଙ୍କ ଟଙ୍କା ଦେଲେ ପୁଅକୁ ଛାଡ଼ିବେ ବୋଲି ଶାନ୍ତନୁଙ୍କ ଘରେ ଦାବି କରିଥିଲେ । ଏ ଘଟଣାକୁ ନେଇ ଶାନ୍ତନୁଙ୍କ ମା ରିଙ୍କି ପାତ୍ର ତେଲକୋଇ ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଥିଲା। ପୋଲିସ ଫୋର୍ସ ନେଇ ରଶ୍ମିଙ୍କ ଘର ଓ ଗାଁରେ ଛାନ ଭିନ୍ନ କରିଥିଲା କିନ୍ତୁ କାଲି ସଂନ୍ଧ୍ୟା ପର୍ଯ୍ୟନ୍ତ ଶାନ୍ତନୁର ପତ୍ତା ମିଳିନଥିଲା। ତେବେ ଆଜି ସକାଳେ ରଶ୍ମି ପାତ୍ରଙ୍କ ଘର ପଛ ପଟେ ଥିବା ଏକ ପାଳ ଭାଡ଼ି ତଳୁ ବାଳକକୁ ମୁର୍ମୂଷୁ ଅବସ୍ଥାରେ ଉଦ୍ଧାର କରାଯାଇଥିଲା। ତେବେ ଏ ତମାମ ଘଟଣାକୁ ନେଇ ପୋଲିସ ଅଧିକ ତଦନ୍ତ ଜାରି ରଖିଛି ।
