ରାୟଗଡ଼ା: ରାୟଗଡ଼ା ଜିଲ୍ଲା କାଶୀପୁର ବ୍ଲକ କଂସାରିଗୁଡ଼ା ନିକଟ ଫୁଲଜବା ମୁଖ୍ୟ ରାସ୍ତାରେ ଏକ ଯୁବକଙ୍କୁ ହତ୍ୟା କରିଥିବା ସନ୍ଦେହ କରାଯାଉଛି। ମୃତକ ହେଉଛନ୍ତି ବନ୍ଧୁଗାଁ ଗାରିଡ଼ି ଗ୍ରାମର କୁସୁମଲ ଖରାଙ୍କ ପୁଅ ବଳରାମ ଖରା (୩୫)। ସେ ଜଣେ ଅଟୋ ଚାଳକ। ବଳରାମ ରାତ୍ର ପ୍ରାୟ ୮ଟା ବେଳେ ନିଜ ଅଟୋରେ ଫେରୁଥିବା ସମୟରେ ତାଙ୍କୁ ହତ୍ୟା କରାଯାଇଥିବା ନେଇ ସନ୍ଦେହ କରାଯାଉଥିବା ପୁଲିସ ପକ୍ଷରୁ ସୂଚନା ମିଳିଛି। ଏ ନେଇ କୌଣସି ସ୍ପଷ୍ଟୋକ୍ତି ମିଳିନଥିବା ବେଳେ ମୃତ ବଳରାମଙ୍କ ସ୍ତ୍ରୀ ଟିକିରି ଥାନାରେ ଏ ନେଇ ଏକ ଏତଲା ଦେଇଛନ୍ତି।
ଏନେଇ ଟିକିରି ଥାନାରେ ଏକ ହତ୍ୟା ମାମଲା କେସ ନଂ ୨୪୦/୨୦୨୪ ରୁଜୁ କରାଯାଇଥିବା ବେଳେ ଏନେଇ ଘଟଣା ସ୍ଥଳରେ ରାୟଗଡ଼ ଏସଡିପିଓ ରଶ୍ମି ରଞ୍ଜନ ସେନାପତିଙ୍କ ନେତୃତ୍ୱରେ ସହ ଟିକିରି ଥାନା ଏଏସଆଇ ମନୋଜ ଜେନା, ଏଏସଆଇ ମହେଶ୍ୱର ପାଇକ ଓ କାଶୀପୁର ଥାନା ଅଧିକାରୀ ସୂର୍ଯ୍ୟ ପ୍ରକାଶ ନାୟକଙ୍କ ସହ ପୁଲିସ ଟିମ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ କରୁଛନ୍ତି। ଉକ୍ତ ଘଟଣାସ୍ଥଳରେ ସାଇଣ୍ଟିଫିକ ଟିମ୍ ମଧ୍ୟ ପହଞ୍ଚି ଘଟଣା ବିଷୟରେ ଅନୁସନ୍ଧାନ କରୁଥିବା ଜଣା ପଡ଼ିଛି। କିନ୍ତୁ ଏ ପର୍ଯ୍ୟନ୍ତ ଯୁବକଙ୍କୁ କିଭଳି ମୃତ୍ୟୁ ଘଟିଛି ଓ କିଏ ହତ୍ୟାକାରୀ ସେ ନେଇ କୌଣସି ସୂଚନା ମିଳିନାହିଁ।
