ମୁମ୍ଵାଇ ୨୫।୦୯: ବଲିଉଡ ଅଭିନେତ୍ରୀ ତଥା ବିଜେପି ସାଂସଦ କଙ୍ଗନା ରଣାଓ୍ୱତ। ସେ ପୁଣି ଥରେ ନିଜ ବୟାନକୁ ନେଇ ଚର୍ଚ୍ଚାକୁ ଆସିଛନ୍ତି। କଙ୍ଗନା ପୁଣିଥରେ କୃଷକଙ୍କୁ ନେଇ ଦେଇଛନ୍ତି ବୟାନ। ଯାହା ଏବେ ରାଜନୀତିରେ ଜୋରଧରିଛି । କଙ୍ଗନାଙ୍କ ବିବୃତ୍ତିରୁ ବିଜେପି ପୁଣି ଥରେ ନିଜକୁ ଦୂରେଇ ରଖିଛି। ଏହା ଦଳର ବିବୃତ୍ତି ନୁହେଁ ବୋଲି କହିଛି।
ପ୍ରକୃତରେ, କଙ୍ଗନା ତିନୋଟି ବିବାଦୀୟ କୃଷି ଆଇନକୁ ଫେରାଇବାକୁ ଦାବି କରିଥିଲେ। ଏହା ପରେ ଦଳ ଏକ ବିବୃତ୍ତି ଜାରି କରି କହିଛି ଯେ କଙ୍ଗନା ଦଳ ସହ ଜଡିତ ପ୍ରସଙ୍ଗରେ କହିବାକୁ ଅନୁମତିପ୍ରାପ୍ତ ନୁହେଁ। ଦଳ ପକ୍ଷରୁ ଜାରି ବିବୃତ୍ତିରେ ବିଜେପି ମୁଖପାତ୍ର ଗୌରବ ଭାଟିଆ କହିଛନ୍ତି ଯେ କେନ୍ଦ୍ର ସରକାର ପ୍ରତ୍ୟାହାର କରିଥିବା କୃଷି ଆଇନ ସହ ଜଡିତ ବିବୃତ୍ତି ସୋସିଆଲ ମିଡିଆରେ ଭାଇରାଲ ହେଉଛି। ମୁଁ ଏହା ସ୍ପଷ୍ଟ କରିବାକୁ ଚାହୁଁଛି ଯେ ଏହା ହେଉଛି କଙ୍ଗନାଙ୍କ ବ୍ୟକ୍ତିଗତ ବିବୃତ୍ତି । କଙ୍ଗନା ଦଳ ପକ୍ଷରୁ ଏକ ସରକାରୀ ବିବୃତ୍ତି ଦେବାକୁ କ୍ଷମତାପ୍ରାପ୍ତ ନୁହଁନ୍ତି । ଆମେ ଏହି ବିବୃତ୍ତିକୁ ନିନ୍ଦା କରୁଛୁ ।
ଦିଲ୍ଲୀ କଂଗ୍ରେସ ମୁଖ୍ୟ ଦେବେନ୍ଦ୍ର ଯାଦବ ଏହାକୁ ନେଇ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି , ‘ଚିନ୍ତା କରିବାର ପ୍ରଶ୍ନ ହେଉଛି କଙ୍ଗନାଙ୍କୁ କିଏ ପ୍ରୋତ୍ସାହିତ କରୁଛି? ଦଳ ତାଙ୍କୁ କାହିଁକି ଅଟକାଉ ନାହିଁ? ଏହି ମହିଳା ପୂର୍ବରୁ କୃଷକମାନଙ୍କୁ ଆତଙ୍କବାଦୀ ବୋଲି କହିଥିଲେ। ଏହା କୃଷକମାନଙ୍କ ପାଇଁ ଏକ ଲଜ୍ଜାଜନକ ବକ୍ତବ୍ୟ।
ସେହିପରି ଜନତା ଦଳ ୟୁନାଇଟେଡ୍ର ବରିଷ୍ଠ ନେତା କେସି ତ୍ୟାଗୀ ମଧ୍ୟ କଙ୍ଗନାଙ୍କ ବୟାନକୁ ନେଇ ଟାର୍ଗେଟ୍ କରିଛନ୍ତି। ସେ କହିଛନ୍ତି, ‘ କଙ୍ଗନାଙ୍କ ବିବୃତ୍ତି ଚାଷୀଙ୍କ ପ୍ରତି ଅପମାନ। ତାଙ୍କ ବିରୋଧରେ ବିଜେପି ଆକ୍ସନ ନେବା ଉଚିତ। ଏହା ପ୍ରଧାନମନ୍ତ୍ରୀଙ୍କ ନିଷ୍ପତ୍ତିର ଅପମାନ।
କଙ୍ଗନାଙ୍କ ବିବୃତ୍ତିରେ କଂଗ୍ରେସ କହିଛି ବର୍ତ୍ତମାନ ବିଜେପି ସାଂସଦ ଏହି ଆଇନ ପ୍ରତ୍ୟାହାର କରିବାକୁ ଯୋଜନା କରୁଛନ୍ତି। କଂଗ୍ରେସ ଚାଷୀଙ୍କ ସହ ଅଛି। ନରେନ୍ଦ୍ର ମୋଦୀ ଏବଂ ତାଙ୍କ ସାଂସଦମାନେ ଯେତେ ଚେଷ୍ଟା କଲେ ଏହା ପ୍ରତ୍ୟାବର୍ତ୍ତନ ହେବ ନାହିଁ। ଏହି ବିବାଦ ବଢ଼ିବା ପରେ କଙ୍ଗନା ଏକ୍ସରେ ଟ୍ୱିଟ୍ କରି ଏହା ତାଙ୍କର ବ୍ୟକ୍ତିଗତ ବିବୃତ୍ତି ବୋଲି କହିଛନ୍ତି। କୃଷି ଆଇନ ଉପରେ ମୋର ମତ ବ୍ୟକ୍ତିଗତ ଏବଂ ଏହାର ଦଳ ସହିତ କୌଣସି ସମ୍ପର୍କ ନାହିଁ ବୋଲି ସେ ଟ୍ୱିଟ୍ କରିଛନ୍ତି।
