ମୁମ୍ବାଇ: ଏନ୍ସିପି ସୁପ୍ରିମୋ ଶରଦ ପାୱାର ବୁଧବାର ମହାରାଷ୍ଟ୍ର ବିଧାନସଭା ନିର୍ବାଚନରେ ଏମ୍ଭିଏର ମୁଖ୍ୟମନ୍ତ୍ରୀ ଚେହେରା ଘୋଷଣା କରିବାକୁ ମନା କରିଦେଇଛନ୍ତି। ମହାବିକାଶ ଆଘାଡି(ଏମ୍ଭିଏ) ପାଇଁ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାମ ଘୋଷଣା କରିବାର କୌଣସି ଆବଶ୍ୟକତା ନାହିଁ ଏବଂ ସେମାନେ ପରବର୍ତ୍ତୀ ପର୍ଯ୍ୟାୟରେ ଏ ସମ୍ପର୍କରେ ମିଳିତ ଭାବେ ନିଷ୍ପତ୍ତି ନେବେ ବୋଲି କହିଛନ୍ତି।
ଜରୁରିକାଳୀନ ପରିସ୍ଥିତି ସମୟରେ ପ୍ରଧାନମନ୍ତ୍ରୀ ଚେହେରା କିଏ ଥିଲା? ନିର୍ବାଚନ ପରେ ମୋରାରଜୀ ଦେଶାଇଙ୍କ ନାମ ସାମ୍ନାକୁ ଆସିଥିଲା। ବର୍ତ୍ତମାନ ମୁଖ୍ୟମନ୍ତ୍ରୀ ପଦ ପାଇଁ ନାମ ଘୋଷଣା କରିବାର ଆବଶ୍ୟକତା ନାହିଁ। ନିର୍ବାଚନ ପରେ ଆମେ ଏକାଠି ବସି ପ୍ରାର୍ଥୀଙ୍କ ବିଷୟରେ ନିଷ୍ପତ୍ତି ନେବୁ ବୋଲି ପାୱାର କୋହ୍ଲାପୁରରେ ସାମ୍ବାଦିକମାନଙ୍କୁ କହିଛନ୍ତି।
ସେ ଆହୁରି କହିଛନ୍ତି ଯେ ମେଣ୍ଟରେ ସର୍ବାଧିକ ଆସନ ଜିତିଥିବା ଦଳ ଆଧାରରେ ମୁଖ୍ୟମନ୍ତ୍ରୀ ପ୍ରାର୍ଥୀ ସ୍ଥିର କରାଯିବ।
ତେବେ ଉଦ୍ଧବ ଠାକରେଙ୍କୁ ମୁଖ୍ୟମନ୍ତ୍ରୀ ଚେହେରା ଭାବେ ଉପସ୍ଥାପନ କରୁଥିବା ଶିବସେନା (ୟୁବିଟି)କୁ ଏହା ପସନ୍ଦ ଆସିନାହିଁ। ନିକଟରେ ଠାକରେ ଦିଲ୍ଲୀରେ କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ରାହୁଲ ଗାନ୍ଧୀ, ସୋନିଆ ଗାନ୍ଧୀ, କେସି ବେଣୁଗୋପାଳଙ୍କ ସମେତ କଂଗ୍ରେସର ଶୀର୍ଷ ନେତୃତ୍ୱଙ୍କୁ ଭେଟିଥିଲେ। ଦିଲ୍ଲୀ ଗସ୍ତ ସମୟରେ ଠାକରେ କଂଗ୍ରେସ ନେତୃତ୍ୱଙ୍କୁ ଆସନ ବଣ୍ଟନ ପୂର୍ବରୁ ଏକ ମିଳିତ ସର୍ଭେ କରିବାକୁ ଅନୁରୋଧ କରିଥିଲେ, ଯାହାଦ୍ୱାରା ମେଣ୍ଟ ମଧ୍ୟରେ କୌଣସି ବିବାଦ ସୃଷ୍ଟି ନ ହୁଏ। ସର୍ବାଧିକ ଆସନ ଥିବା ଦଳକୁ ମୁଖ୍ୟମନ୍ତ୍ରୀ ପଦ ଦେବାର ଫର୍ମୁଲାକୁ ନେଇ ମଧ୍ୟ ସେ ଅସନ୍ତୋଷ ବ୍ୟକ୍ତ କରିଛନ୍ତି। ସେ କହିଛନ୍ତି ଏହା ଅଧିକ ସଂଘର୍ଷ ସୃଷ୍ଟି କରିପାରେ, କାରଣ ଏହା ପରେ ଦଳଗୁଡ଼ିକ ସେମାନଙ୍କର ଜିତିବାର ସମ୍ଭାବନା ବୃଦ୍ଧି କରିବା ପାଇଁ ସର୍ବାଧିକ ସଂଖ୍ୟକ ଆସନ ଦାବି କରିବା ଆରମ୍ଭ କରିଦେବେ।
