କଠୋର ହେଲା କାନାଡା। ନିର୍ବାଚନ ପୂର୍ବରୁ ଭାରତୀୟଙ୍କୁ ବଡ଼ ଝଟ୍କା ଦେଲେ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ। କାନାଡାରେ ଅସ୍ଥାୟୀ ଚାକିରି କରୁଥିବା ବିଦେଶୀଙ୍କ ସଂଖ୍ୟା ହ୍ରାସ କରିବାକୁ ଟ୍ରୁଡୋ ଘୋଷଣା କରିଛନ୍ତି।
ସୋଶାଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ ସେୟାର କରି ଜଷ୍ଟିନ ଟ୍ରୁଡୋ ଲେଖିଛନ୍ତି, ‘ଶ୍ରମ ବଜାରରେ ପରିବର୍ତ୍ତନ ଆସିଛି।
ଆମେ କାନାଡାକୁ ଆସୁଥିବା ସ୍ୱଳ୍ପ ବେତନ ଅସ୍ଥାୟୀ ବିଦେଶୀ ଶ୍ରମିକଙ୍କ ସଂଖ୍ୟା ହ୍ରାସ କରିବାକୁ ଯାଉଛୁ। ବର୍ତ୍ତମାନ ଆମର କମ୍ପାନୀଗୁଡିକ କାନାଡିୟ ଶ୍ରମିକ ଏବଂ ଯୁବକମାନଙ୍କୁ ଅଧିକରୁ ଅଧିକ ଚାକିରି ଯୋଗାଇବା।’
ଜଷ୍ଟିନ ଟ୍ରୁଡୋଙ୍କ ଏହି ନିଷ୍ପତ୍ତି କମ୍ ବେତନରେ କାମ କରୁଥିବା ଏବଂ କାନାଡାରେ ଅସ୍ଥାୟୀ ଚାକିରି କରୁଥିବା ଲକ୍ଷ ଲକ୍ଷ ବିଦେଶୀଙ୍କ ଉପରେ ପ୍ରଭାବ ପକାଇବାକୁ ଯାଉଛି। କାନାଡାରେ ରହୁଥିବା ବିଦେଶୀମାନଙ୍କ ମଧ୍ୟରେ ଅଧିକାଂଶ ସଂଖ୍ୟାରେ ଭାରତୀୟ ଶିଖ ଏବଂ ଛାତ୍ର ଅଛନ୍ତି। ଯେଉଁମାନେ ସେଠାରେ ରୁହନ୍ତି ଏବଂ ଛୋଟ ବ୍ୟବସାୟ ଏବଂ କମ୍ପାନୀରେ କାମ କରନ୍ତି।
ସେପଟେ ନିର୍ବାଚନ ବିଶେଷଜ୍ଞମାନେ କହିଛନ୍ତି ଯେ ଜଷ୍ଟିନ ଟ୍ରୁଡୋଙ୍କ ଏହି ନିଷ୍ପତ୍ତି ପ୍ରବାସୀ ତଥା ଯୁବକମାନଙ୍କ ମଧ୍ୟରେ ବେକାରୀ ବୃଦ୍ଧି କରିବ। ଟ୍ରୁଡୋଙ୍କର ଏହି ନିଷ୍ପତ୍ତିକୁ ବିଶେଷଜ୍ଞ ମାନେ ରାଜନୀତି ସହିତ ସଂଯୁକ୍ତ କରୁଛନ୍ତି। ଏହି ନିଷ୍ପତ୍ତି ଯୋଗୁଁ କାନାଡା ପ୍ରଧାନମନ୍ତ୍ରୀ ସମାଲୋଚନାର ସମ୍ମୁଖୀନ ହେଉଛନ୍ତି। ବହୁ ସଂଖ୍ୟକ ଉପଭୋକ୍ତା ତାଙ୍କ ଇସ୍ତଫା ଦାବି କରୁଛନ୍ତି। ଅନେକ କାନାଡିୟ X ବ୍ୟବହାରକାରୀ ତାଙ୍କୁ ଏପର୍ଯ୍ୟନ୍ତ ସବୁଠାରୁ ଖରାପ ପ୍ରଧାନମନ୍ତ୍ରୀ ବୋଲି ମଧ୍ୟ କହୁଛନ୍ତି।
କହିରଖୁ ଯେ, କରୋନା ମହାମାରୀ ପରେ ଶ୍ରମିକଙ୍କ ଅଭାବ ହେତୁ ଟ୍ରୁଡୋ ସରକାର ପ୍ରତିବନ୍ଧକୁ କୋହଳ କରିଥିଲେ । ଏହାପରେ ସ୍ୱଳ୍ପ ବେତନ ପ୍ରାପ୍ତ ଅସ୍ଥାୟୀ କର୍ମଚାରୀଙ୍କ ସଂଖ୍ୟା ସେଠାରେ ଯଥେଷ୍ଟ ବୃଦ୍ଧି ପାଇଥିଲା। ବର୍ତ୍ତମାନ କାନାଡା ଇମିଗ୍ରେସନ ସିଷ୍ଟମରେ ପରିବର୍ତ୍ତନ କରିବାକୁ ଯାଉଛି।
ସେପଟେ କାନାଡା ପରେ ଅଷ୍ଟ୍ରେଲିଆ ମଧ୍ୟ ଭାରତୀୟ ଛାତ୍ରମାନଙ୍କୁ ଏକ ବଡ଼ ଝଟକା ଦେଇଛି। ଏଠାରେ ବୃଦ୍ଧି ପାଉଥିବା ଛାତ୍ର ସଂଖ୍ୟାକୁ ନିୟନ୍ତ୍ରଣ କରିବା ପାଇଁ ସରକାର ବର୍ତ୍ତମାନ ପ୍ରସ୍ତୁତି ଚଳାଇଛନ୍ତି। ଅଷ୍ଟ୍ରେଲିଆ ମଙ୍ଗଳବାର କହିଛି ଯେ, ଏହା ୨୦୨୫ ସୁଦ୍ଧା ଅନ୍ତର୍ଜାତୀୟ ଛାତ୍ର ନାମଲେଖା ସଂଖ୍ୟାକୁ ୨୭୦,୦୦୦ ପର୍ଯ୍ୟନ୍ତ ସୀମିତ କରିବ। କାରଣ ରେକର୍ଡ ସ୍ଥାନାନ୍ତରଣ ହେତୁ ପ୍ରପର୍ଟି ମୂଲ୍ୟ ବୃଦ୍ଧି ପାଇଛି। ଏହା ଭାରତୀୟ ଛାତ୍ରୀଛାତ୍ରଙ୍କ ପାଇଁ ଏକ ଝଟ୍କା ପ୍ରମାଣିତ ହେବ।
