ରାଞ୍ଚି : ଝାଡଖଣ୍ଡର ରାଜଧାନୀ ରାଞ୍ଚିରେ ଜଣେ ସ୍ପେଶାଲ-ବ୍ରାଞ୍ଚ୍ ପୁଲିସ୍ ଏସ୍ଆଇଙ୍କୁ ବିଚ୍ ରାସ୍ତାରେ ଗୁଳି କରି ହତ୍ୟା କରାଯାଇଛି । ଗୁଳିମାଡରେ ଘଟଣା ସ୍ଥଳରେ ହିଁ ପ୍ରାଣ ହରାଇଥିବା ମୃତ ଏସ୍ଆଇଙ୍କ ନାମ ଅନୁପମ୍ କଚ୍ଛପ ବୋଲି ଜଣାପଡିଛି । ଜଣେ ଏସ୍ଆଇଙ୍କୁ କିଏ ଓ କାହିଁକି ଗୁଳି କରି ହତ୍ୟା କରିଛି ସେସମ୍ପର୍କରେ ଏବେ ପୁଲିସ୍ ଛାନ୍ବିନ୍ କରୁଛି ।
ତେବେ ପ୍ରାଥମିକ ତଦନ୍ତରୁ ଅନୁପମ ତାଙ୍କର କିଛି ସାଙ୍ଗମାନଙ୍କ ସହ ପାର୍ଟି କରିବାକୁ କାଙ୍କେ ରିଙ୍ଗ୍ରୋଡରେ ଥିବା ଏକ ଢ଼ାବାକୁ ଯାଇଥିବା ଜଣାପଡିଛି । ଅନୁପମ ଓ ତାଙ୍କ ସାଙ୍ଗମାନେ ରାତି ପ୍ରାୟ ୧ ଟା ପର୍ଯ୍ୟନ୍ତ ପାର୍ଟି କରିଥିଲେ । ଏହାପରେ ପ୍ରାୟ ରାତି ୨ଟାରେ ଅନୁପମ ନିଜ ବାଇକ୍ରେ ଘରକୁ ଫେରୁଥିଲେ । ଏହି ସମୟରେ ଅପରାଧୀମାନେ ଅନୁପମଙ୍କୁ ଗୁଳି କରି ହତ୍ୟା କରିଛନ୍ତି । ରିଙ୍ଗରୋଡ୍ରୁ ଜବତ ହୋଇଥିବା ତାଙ୍କ ମରଶରୀରରେ ଦୁଇଟି ଗୁଳି ବାଜିଥିବା ସ୍ପଷ୍ଟ କରିଛି ପୁଲିସ । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ତଦନ୍ତ ପ୍ରକ୍ରିୟା ଆଗକୁ ବଢ଼ିବ ବୋଲି ପୁଲିସ୍ କହିଛି । ଅନୁପମ ୨୦୧୮ରେ ପୁଲିସ ସେବାରେ ଯୋଗ ଦେଇଥିଲେ ।
