ଆମେଥି, ରାଏବରେଲିରେ ପ୍ରାର୍ଥୀ ଘୋଷଣା କରିବାରେ କଂଗ୍ରେସ ଏତେ ବିଳମ୍ବ କରୁଛି କାହିଁକି – Kalinga News

ନୂଆଦିଲ୍ଲୀ : ଲୋକସଭା ନିର୍ବାଚନ ପାଇଁ କଂଗ୍ରେସ ପ୍ରାୟ ସବୁ ଆସନରେ ପ୍ରାର୍ଥୀ ଘୋଷଣା କରି ସାରିଛି। କିନ୍ତୁ ଉତ୍ତରପ୍ରଦେଶର ଆମେଥି ଏବଂ ରାଏବରେଲିରେ କଂଗ୍ରେସ ପ୍ରାର୍ଥୀ ଘୋଷଣା କରିନାହିଁ। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ ଆଜି କହିଛନ୍ତି, ଆସନ୍ତା କିଛି ଦିନ ମଧ୍ୟରେ ରଏବରେଲି ଏବଂ ଆମେଥିରେ ପ୍ରାର୍ଥୀ ଘୋଷଣା ହେବ। ଏକ ସାମ୍ବାଦିକ ସମ୍ମିଳନୀରେ ଉଦବୋଧନ ଦେଇ ମଲ୍ଲିକାର୍ଜୁନ ଖଡ଼ଗେ ଦାବି କରିଛନ୍ତି ଯେ ଦୁର୍ନୀତିଗ୍ରସ୍ତ ଜେଲରେ ରହିବା ଉଚିତ କିନ୍ତୁ ଏଠି ଦୁର୍ନୀତିଗ୍ରସ୍ତ ନେତାମାନେ ବିଜେପିରେ ଯୋଗ ଦେଉଛନ୍ତି । ସେମାନଙ୍କୁ ବିଜେପି କୋଳରେ ବସାଉଛି ଏବଂ ରାଜ୍ୟସଭା କିମ୍ବା ବିଧାନସଭାକୁ ପଠାଉଛି। ତେବେ ଖଡ଼ଗେଙ୍କୁ ଆମେଥି ଏବଂ ରାଏବରେଲି ଆସନରେ ପ୍ରାର୍ଥୀ କାହିଁକି ଘୋଷଣା କରାଯାଇନାହିଁ ବୋଲି ପ୍ରଶ୍ନ କରିବାରୁ ସେ କହିଛନ୍ତି, ଏଥିପାଇଁ ଆଉ କିଛି ଦିନ ଅପେକ୍ଷା କରିବାକୁ ପଡ଼ିବ। ଲୋକମାନଙ୍କଠାରୁ ମତାମତ ମଗାଗଲେ ଆମେଥି ଏବଂ ରାଏବରେଲି ଆସନରେ ପ୍ରାର୍ଥୀ ଘୋଷଣା କରାଯିବ ବୋଲି ସେ କହିଛନ୍ତି।