ତିହାର ଜେଲରେ ଅରବିନ୍ଦ କେଜ୍ରିୱାଲଙ୍କ ପ୍ରଥମ ସକାଳ : ଯୋଗ ଏବଂ ଧ୍ୟାନ ଓ ସକାଳ ଜଳଖିଆରେ ପାଉଁରୁଟି, ଚା – Kalinga News

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କର ଆଜି ତିହାର ଜେଲରେ ପ୍ରଥମ ସକାଳ ଥିଲା। କେନ୍ଦ୍ରୀୟ କାରାଗାରରେ ପ୍ରଥମ ରାତି ବିତାଇବାପରେ କେଜ୍ରିୱାଲଙ୍କର ଆଜି ଜେଲରେ ପ୍ରଥମ ସକାଳ ଥିଲା। କେଜ୍ରିୱାଲଙ୍କ ଜେଲରେ ଜଳଖିଆରେ ପାଉଁରୁଟି ଏବଂ ଚା ଦିଆଯାଇଥିଲା। ସୋମବାର ଦିନ କେଜ୍ରିୱାଲଙ୍କୁ ୧୪ ଦିନ ନ୍ୟାୟିକ ହାଜତ ପଠାଯାଇଥିଲା। ଏପ୍ରିଲ ୧୫ ପର୍ଯ୍ୟନ୍ତ ଆପ୍ ସୁପ୍ରିମୋ ନ୍ୟାୟିକ ହାଜତରେ ରହିବେ। ଜେଲ୍ ସୂତ୍ରରୁ ମିଳିଥିବା ସୂଚନାନୁଯାୟୀ ଆଜି ସକାଳ ପ୍ରାୟ ୬.୪୦ ସମୟରେ କେଜ୍ରିୱାଲଙ୍କୁ ଜଳଖିଆ ଖାଇବାକୁ ଦିଆଯାଇଥିଲା। ମାର୍ଚ୍ଚ ୨୧ ତାରିଖରେ ଗିରଫ ହୋଇଥିବା କେଜ୍ରିୱାଲ ଜେଲ୍ ନମ୍ବର ୨ରେ ଏକାକୀ ରହିବେ। କେଜ୍ରିୱାଲ ମଧ୍ୟ ଆଜି ସକାଳେ ତାଙ୍କ ପ୍ରକୋଷ୍ଠରେ ପ୍ରଥମେ ଯୋଗ କରିଥିଲେ ଏବଂ ଏହାପରେ ସେ ଧ୍ୟାନ କରିଥିଲେ। କେଜ୍ରିୱାଲଙ୍କୁ ଅପରାହ୍ନ ୧୨ଟାରେ ମଧ୍ୟାହ୍ନ ଭୋଜନ ଖାଇବାକୁ ଦିଆଯାଇଛି। ସନ୍ଧ୍ୟା ୫.୩୦ରେ କେଜ୍ରିୱାଲଙ୍କୁ ରାତି ଖାଇବା ଦିଆଯିବ। ଏହାପରେ ସନ୍ଧ୍ୟା ୭ଟାରେ ତାଙ୍କୁ ପୁଣି ଅନ୍ୟ କଏଦୀଙ୍କ ପରି ଲକଅପରେ ରଖାଯିବ। ସକାଳ ୫ଟାରୁ ରାତି ୧୧ଟା ପର୍ଯ୍ୟନ୍ତ କେଜ୍ରିୱାଲ ଜେଲରେ ଟିଭି ଦେଖିପାରିବେ। ଜେଲରେ ମଶୁରି ଥିବାରୁ କେଜ୍ରିୱାଲ ଆରାମରେ ଶୋଇ ପାରିଛନ୍ତି। ସତ୍ୟେନ୍ଦ୍ର ଜୈନ, ସଂଜୟ ସିଂହ ଏବଂ ମନୀଷ ସିସୋଦିଆଙ୍କ ପରେ କେଜ୍ରିୱାଲ ଚତୁର୍ଥ ଆପ୍ ନେତା ଭାବେ ତିହାର ଜେଲରେ ରହିଛନ୍ତି। ୨୦୨୩ ଅକ୍ଟୋବରରେ ସଂଜୟ ସିଂହ ଏହି ମାମଲାରେ ଗିରଫ ହୋଇଥିଲେ । ପୂର୍ବରୁ ତାଙ୍କୁ ଜେଲ୍ ନମ୍ବର ୨ରେ ରଖାଯାଇଥିଲା। କିନ୍ତୁ ନିକଟରେ ତାଙ୍କୁ ଜେଲ୍ ନମ୍ବର ୫କୁ ଅଣାଯାଇଥିଲା। ସିସୋଦିଆ ଜେଲ୍ ନମ୍ବର ୧ରେ ଥିବାବେଳେ ବିଆରଏସ୍ ନେତ୍ରୀ କେ କବିତା ଜେଲ୍ ନମ୍ବର ୬ର ମହିଳା ବିଭାଗରେ ରହିଛନ୍ତି। ଗୋଟିଏ ଦଶନ୍ଧୀ ପରେ କେଜ୍ରିୱାଲ ତିହାର ଜେଲକୁ ଫେରିଛନ୍ତି। ୨୦୧୧ରେ ସେ ଲୋକପାଳ ବିଲକୁ ବିରୋଧ କରି ଆନ୍ନା ହଜାରେଙ୍କ ସହ ଗିରଫ ହୋଇଥିଲେ। ସେ ସମୟରେ କେଜ୍ରିୱାଲ ୭ ଦିନ ଜେଲରେ ରହିଥିଲେ।