[ad_1]
ମୁମ୍ବାଇ: ଉତ୍ତରପ୍ରଦେଶରେ ଦେଶର ସବୁଠାରୁ ଅଧିକ ଲୋକସଭା ଆସନ ରହିଛି। ଏହାପରେ ଉତ୍ତରପ୍ରଦେଶ ପଛକୁ ମହାରାଷ୍ଟ୍ରରେ ସର୍ବାଧିକ ୪୮ଟି ଲୋକସଭା ଆସନ ରହିଛି। ମହାରାଷ୍ଟ୍ରରେ ବିରୋଧୀ ଇଣ୍ଡିଆ ମେଣ୍ଟର ଆସନ ବୁଝାମଣା ଚୂଡ଼ାନ୍ତ ହୋଇଛି। ବହୁ ବିଚାରବିମର୍ଶ ଏବଂ ଆଲୋଚନା ପରେ ଉଦ୍ଧବସେନା, କଂଗ୍ରେସ ଓ ଏନ୍ସିପି (ଶରଦପାୱାର୍) ମଧ୍ୟରେ ଆସନ ବୁଝାମଣା ହୋଇଛି। ଉଦ୍ଧବସେନା ୨୧ଟି ଆସନ, କଂଗ୍ରେସ ୧୫ଟି ଓ ଶରଦ ପାୱାରଙ୍କ ଏନସିପି ଦଳ ୯ଟି ଆସନରେ ଲଢ଼ିବାକୁ ସହମତି ପ୍ରକାଶ କରିଛନ୍ତି। ମିଳିଥିବା ସୂଚନାନୁଯାୟୀ ଶରଦ ପାୱାରଙ୍କ ଘରେ ଏନେଇ ଏକ ବୈଠକ ହୋଇଥିଲା। ଉଦ୍ଧବସେନା, କଂଗ୍ରେସ ଓ ଶରଦ ପାୱାରଙ୍କ ଦଳ ୪୫ଟି ଆସନରେ ଲଢ଼ିବେ। ନୂତନ ଭାବେ ଯୋଗ ଦେଇଥିବା ପ୍ରକାଶ ଆମ୍ବେଦକରଙ୍କ ବଞ୍ଚିତ ବହୁଜନ ଅଘାଡ଼ି (ଭିବିଏ)କୁ ଦୁଇଟି ଆସନ ଓ ରାଜୁ ସେଟ୍ଟୀଙ୍କ ସ୍ବାଭିମାନୀ ପକ୍ଷ ଗୋଟିଏ ଆସନରେ ଲଢ଼ିବାକୁ ଦଳର ପ୍ରମୁଖ ନେତାମାନେ ରାଜି ହୋଇଛନ୍ତି। ଏହି ବୈଠକରେ, କଂଗ୍ରେସ ନେତା ନାନା ପାଟୋଲ, ପୃଥ୍ବୀରାଜ ଚୌହାନ, ବର୍ଷା ଗାଏକୱାଡ୍, ଏନ୍ସିପି-ଏସ୍ପିର ଜୟନ୍ତ ପାଟିଲ୍, ଜିତେନ୍ଦ୍ର ଅୱଧ, ଅନୀଲ ଦେଶମୁଖ, ଶିବ ସେନା (ଉଦ୍ଧବ ଠାକରେ)ର ସଞ୍ଜୟ ରାଉତ, ବିନାୟକ ରାଉତ ପ୍ରମୁଖ ଯୋଗ ଦେଇଥିଲେ। ଉଲ୍ଲେଖଯୋଗ୍ୟ ଯେ ୨୦୧୯ ଲୋକସଭା ନିର୍ବାଚନରେ ବିଜେପି ରାଜ୍ୟରେ ୨୩ଟି ଆସନରେ ଜିତିଥିବା ବେଳେ ଶିବସେନା (ଅବିଭକ୍ତ) ୧୮ଟି ଆସନରେ, ଏନ୍ସିପି (ଅବିଭକ୍ତ) ୪ଟି, କଂଗ୍ରେସ, ଏଆଇଏମ୍ଆଇଏମ୍ ଗୋଟିଏ ଲେଖାଏଁ ଆସନରେ ଜିତିଥିବା ବେଳେ ଜଣେ ସ୍ବାଧୀନ ପ୍ରାର୍ଥୀ ଗୋଟିଏ ଆସନରେ ଜିତିଥିଲେ।
[ad_2]
