ସୋନିଆ ଗାନ୍ଧିଙ୍କ ସମ୍ପତ୍ତି ୫ ବର୍ଷରେ ୭୨ ଲକ୍ଷ ଟଙ୍କା ବୃଦ୍ଧି ପାଇଛି, ଇଟାଲିରେ ସମ୍ପତ୍ତି ଅଛି – Kalinga News

ନୂଆଦିଲ୍ଲୀ: ବରିଷ୍ଠ କଂଗ୍ରେସ ନେତ୍ରୀ ସୋନିଆ ଗାନ୍ଧିଙ୍କ ସମ୍ପତ୍ତି ଗତ ୫ ବର୍ଷ ମଧ୍ୟରେ ୭୨ ଲକ୍ଷ ଟଙ୍କା ବୃଦ୍ଧି ପାଇଛି। ସୋନିଆଙ୍କ ସମ୍ପତ୍ତି ଏବେ ୧୨.୫୩ କୋଟିରେ ପହଞ୍ଚିଛି। ତେବେ ତାଙ୍କ ନାଁରେ କୌଣସି ଗାଡି ନାହିଁ। ରାଜସ୍ଥାନରୁ ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥିପତ୍ର ଦାଖଲ କରିବା ସମୟରେ ସୋନିଆ ଦାଖଲ କରିଥିବା ସତ୍ୟପାଠରୁ ଏହା ଜଣାପଡ଼ିଛି। ସତ୍ୟପାଠରେ ସୋନିଆ ଗାନ୍ଧି ଇଟାଲିରେ ପୈତୃକ ସମ୍ପତ୍ତିରେ ଥିବା ତାଙ୍କ ଅଂଶ ବିଷୟରେ ଉଲ୍ଲେଖ କରିଛନ୍ତି। ଏହାର ମୂଲ୍ୟ ବର୍ତ୍ତମାନ ୨୬ ଲକ୍ଷ ଟଙ୍କାରୁ ଅଧିକ ରହିଛି। ତାଙ୍କ ପାଖରେ ୮୮ କେଜି ରୁପା ଓ ୧୨୬୭ ଗ୍ରାମ୍ ସୁନା ଓ ଗହଣା ଅଛି। ଏହାବ୍ୟତୀତ ଦିଲ୍ଲୀର ଡେରା ମଣ୍ଡି ଗାଁରେ ତିନି ବିଘା (୨୫୨୯.୨୮ ବର୍ଗମିଟର) ଚାଷଜମି ଅଛି। ଏହାର ବର୍ତ୍ତମାନ ବଜାର ମୂଲ୍ୟ ୫.୮୮ କୋଟି ଟଙ୍କା ହେବ ବୋଲି ଆକଳନ କରାଯାଇଛି। ଆୟ ଦୃଷ୍ଟିରୁ ସେ ସାଂସଦ ଭାବରେ ଦରମା, ରୟାଲ୍ଟି ଆୟ, ବ୍ୟାଙ୍କ ଜମା ଉପରେ ସୁଧ, ମ୍ୟୁଚୁଆଲ ଫଣ୍ଡରୁ ଲାଭାଂଶ ଏବଂ ପୁଞ୍ଜି ଲାଭ ପାଇଥାନ୍ତି। ସେ ପେଙ୍ଗୁଇନ୍ ବୁକ୍ ଇଣ୍ଡିଆ, ଅକ୍ସଫୋର୍ଡ ୟୁନିଭର୍ସିଟି ପ୍ରେସ୍, ଆନନ୍ଦ ପବ୍ଲିଶର୍ସ ଏବଂ କଣ୍ଟିନେଣ୍ଟାଲ ପବ୍ଲିକେସନ୍ ସମେତ ବିଭିନ୍ନ ପ୍ରକାଶକଙ୍କଠାରୁ ରୟାଲ୍ଟି ମଧ୍ୟ ଗ୍ରହଣ କରନ୍ତି। ସତ୍ୟପାଠରେ ଅକ୍ସଫୋର୍ଡ ୟୁନିଭର୍ସିଟି ପ୍ରେସରୁ ୧.୬୯ ଲକ୍ଷ ଟଙ୍କାର ରୟାଲ୍ଟି ପାଇବା ବିଷୟରେ ସେ ଉଲ୍ଲେଖ କରିଛନ୍ତି।