ପ୍ରତିବର୍ଷ ଆଶ୍ଵିନ ମାସ ପୂର୍ଣ୍ଣମୀ ତିଥିରେ ରେଢ଼ାଖୋଲ ବ୍ଲକ କଦଳୀଗଡ ପଞ୍ଚାୟତ ଅନ୍ତର୍ଗତ ଧଉରାଖମଣ ଗ୍ରାମ ନିକଟସ୍ଥ ସାପଘରା ନାମକ ପାହାଡରେ ପଞ୍ଚରାପାଟ ଦେବୀଙ୍କ ପୂଜା ହୋଇଥାଏ ।ସେହିପରି ଗତକାଲି ମଧ୍ୟ ଏହି ଦେବୀଙ୍କ ପୀଠରେ ପୂଜା କରାଯାଇଛି । ପାହାଡର ଚାରିପଟ ଘଞ୍ଚ ଜଙ୍ଗଲରେ ପରିପୂର୍ଣ୍ଣ । ଆଉ ଏହାରି ଭିତରେ ଦେବୀ ପଞ୍ଚରାପାଟଙ୍କ ପୀଠ ଅବସ୍ଥିତ ।
ବଣୁଆ ହାତୀଙ୍କ ପାଦଚିହ୍ନରେ ଆଚ୍ଛାଦିତ ଜଙ୍ଗଲୀ ରାସ୍ତାରେ ନାଳ ନର୍ଦ୍ଦମା ଡେଇଁ ଆଖପାଖ ଅଞ୍ଚଳର ଶତାଧିକ ମାନସିକଧାରି ଶ୍ରଦ୍ଧାଳୁ ହାତରେ ନଡ଼ିଆ, କଦଳୀ ଆଦି ଭୋଗ ସାମଗ୍ରୀ ଧରି ପହଞ୍ଚିଥିଲେ ମାଁ ପଞ୍ଚରାପାଟ ଦେବୀଙ୍କ ପୀଠରେ । ଢୋଲ, ନିଷାଣ, ମହୁରୀ ଓ ଘଣ୍ଟ ବାଦ୍ୟରେ ଉକ୍ତ ସ୍ଥାନଟି ପ୍ରକମ୍ପିତ ହୋଇ ଉଠିଥିଲା ।
ସ୍ଥାନୀୟ ଭକ୍ତଙ୍କ କହିବା ଅନୁଯାୟୀ ଶହଶହ ବର୍ଷ ହେବ ପଞ୍ଚରାପାଟ ଦେବୀଙ୍କ ପୂଜା ଏହି ସ୍ଥାନରେ ହୋଇଆସୁଅଛି । ଅତୀତରେ ସୁବର୍ଣ୍ଣପୁରର ରାଜା ଓ ରେଢ଼ାଖୋଲ ରାଜାଙ୍କ ମଧ୍ୟରେ ଯୁଦ୍ଧ ହୋଇଥିଲା । ଯୁଦ୍ଧରେ ସୁବର୍ଣ୍ଣପୁର ରାଜା ରେଢ଼ାଖୋଲ ରାଜାଙ୍କୁ ପରାସ୍ତ କରି ସମଗ୍ର ରେଢ଼ାଖୋଲ ଅଞ୍ଚଳକୁ ନିଜେ ଅକ୍ତିଆର କରିବାକୁ ବସିଥିଲା ।
ଆଉ ସେହି ସମୟରେ ମାଁ ପଞ୍ଚରାପାଟ ଆବିର୍ଭାବ ହୋଇ ଏହି ସ୍ଥାନରୁ ରେଢ଼ାଖୋଲକୁ ରକ୍ଷା କରିଥିଲେ । ସେହିଦିନ ଠାରୁ ଦୁଇ ଜିଲ୍ଲାର ସୀମାରେ ମାଁ ପଞ୍ଚରାପାଟ ପୂଜା ପାଇ ଆସୁଥିବା ଭକ୍ତମାନଙ୍କର ବିଶ୍ୱାସ ରହିଛି । ତେବେ ଏହି ଘଞ୍ଚ ଜଙ୍ଗଲ ମଧ୍ୟରେ ଶହଶହ ବର୍ଷ ହେଲା ମା’ ପଞ୍ଚରାପାଟ ପୂଜା ପାଇ ଆସୁଥିଲେ ମଧ୍ୟ ଆଜି ଯାଏ ପ୍ରଶାସନର ଦୃଷ୍ଟିଗୋଚର ହୋଇ ପାରିନାହିଁ ।
ପୂର୍ବଭଳି ଆଜିବି ଅତି ଖରାପ ସ୍ଥିତିରେ ଲୋକେ ଯାଉଛନ୍ତି ମା’ଙ୍କ ପୀଠକୁ । ବାରମ୍ବାର ପ୍ରଶାସନକୁ ଜଣାଇ ଥିଲେ ମଧ୍ୟ ଏଥିପ୍ରତି କେହି ଦୃଷ୍ଟି ଦେଉନଥିବା କହିଛନ୍ତି ସ୍ଥାନୀୟ ଲୋକେ । ଏଠାକୁ ଯିବା ପାଇଁ ଭଲ ରାସ୍ତାଟିଏ କରିବା ସହ ଖରାପ ହୋଇ ପଡିରହିଥିବା ନଳକୂପଟି ସଜାଡିବା ସହ ମା’ଙ୍କ ସ୍ଥାନରେ ଏକ ମଣ୍ଡପ କରିବା ପାଇଁ ସରକାରଙ୍କୁ ଦାବି କରିଛନ୍ତି ଲୋକେ ।
