ୱାଶିଂଟନ: ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ କାର୍ଯ୍ୟକାଳ ଶେଷ ହେବାକୁ ପ୍ରାୟ ୬୮ ଦିନ ବାକି ଅଛି। ଜାନୁଆରୀ ୨୦ରେ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶପଥ ସହିତ କ୍ଷମତା ହସ୍ତାନ୍ତର ପ୍ରକ୍ରିୟା ଶେଷ ହେବ। ଏହାପୂର୍ବରୁ ହ୍ବାଇଟ ହାଉସରେ ଏକ ବୈଠକ ଅନୁଷ୍ଠିତ ହେବ।
ଏଥିରେ ବାଇଡେନଙ୍କ ପତ୍ନୀ ଜିଲ୍ ବାଇଡେନ ମଧ୍ୟ ଉପସ୍ଥିତ ରହିବେ।
ତେବେ ସିଏନ୍ଏନ୍ ରିପୋର୍ଟ ଅନୁଯାୟୀ ଆମେରିକାର ପୂର୍ବତନ ପ୍ରଥମ ଲେଡି ତଥା ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପତ୍ନୀ ମେଲାନିଆ ଏହି ପାରମ୍ପରିକ ହ୍ବାଇଟ ହାଉସର ବୈଠକରେ ଯୋଗଦେବେ ନାହିଁ।
ଗତ ସପ୍ତାହରେ ଜିଲ ବାଇଡେନ ଏନେଇ ମେଲାନିଆ ଟ୍ରମ୍ପଙ୍କୁ ନିମନ୍ତ୍ରଣ କରିଥିଲେ। ସିଏନ୍ଏନ୍ ରିପୋର୍ଟ ଅନୁଯାୟୀ, ରାଷ୍ଟ୍ରପତି ନିର୍ବାଚନରେ ଟ୍ରମ୍ପ ବିପୁଳ ସଂଖ୍ୟାଗରିଷ୍ଠତା ହାସଲ କରିବା ପରେ ବାଇଡେନ ଟ୍ରମ୍ପଙ୍କୁ ଓଭାଲ ଅଫିସକୁ ନିମନ୍ତ୍ରଣ କରିଥିଲେ। ପରମ୍ପରା ଅନୁଯାୟୀ ଜିଲ୍ ବାଇଡେନ ଗତ ସପ୍ତାହରେ ମେଲାନିଆ ଟ୍ରମ୍ପଙ୍କୁ ମଧ୍ୟ ନିମନ୍ତ୍ରଣ କରିଥିଲେ।
ଏହାକୁ ଆମେରିକାରେ ଶାନ୍ତିପୂର୍ଣ୍ଣ ଭାବରେ କ୍ଷମତାର ସ୍ଥାନାନ୍ତରର ପ୍ରତୀକ ଭାବରେ ବିବେଚନା କରାଯାଇଥାଏ। କାର୍ଯ୍ୟସୂଚୀ ଅନୁଯାୟୀ ବୁଧବାର ଟ୍ରମ୍ପ ଏବଂ ବାଇଡେନଙ୍କ ମଧ୍ୟରେ ଭେଟ ହେବାର କାର୍ଯ୍ୟକ୍ରମ ରହିଛି।
ବର୍ତ୍ତମାନର ଫାଷ୍ଟ ଲେଡି ହ୍ବାଇଟ ହାଉସ୍ରେ ଭବିଷ୍ୟତର ରାଷ୍ଟ୍ରପତିଙ୍କ ପତ୍ନୀଙ୍କୁ ନିମନ୍ତ୍ରଣ କରିଛନ୍ତି। ଏହି ପରମ୍ପରା ୨୦୧୬ରେ ମଧ୍ୟ ପାଳନ କରାଯାଇଥିଲା । ପୂର୍ବତନ ରାଷ୍ଟ୍ରପତି ବାରାକ ଓବାମାଙ୍କ କାର୍ଯ୍ୟକାଳ ସମୟରେ ତତ୍କାଳୀନ ପ୍ରଥମ ଲେଡି ମିସେଲ ଓବାମା ହ୍ବାଇଟ ହାଉସର ହଳଦିଆ ଓଭାଲ ରୁମରେ ମେଲାନିଆ ଟ୍ରମ୍ପଙ୍କୁ ଚା ’ପାଇଁ ଆମନ୍ତ୍ରଣ କରିଥିଲେ। ମିସେଲ ମଧ୍ୟ ମେଲାନିଆଙ୍କ ବ୍ୟକ୍ତିଗତ ବାସଭବନ ପରିଦର୍ଶନ କରିଥିଲେ।
