ଭୁବନେଶ୍ବର: ‘ଦି ସୋସାଇଟି ଫର ଡେଭଲପମେଣ୍ଟ ଅଫ୍ ରୁରାଲ୍ ଲିଟରେଚର’ ତରଫରୁ ୫ ଦିନିଆ ଚିଲିକାସେଲଡକ୍ ଅନ୍ତର୍ଜାତୀୟ ଲୋକମହୋତ୍ସବ- ୨୦୨୪ ଆଜି ଆରମ୍ଭ ହୋଇଛି। ନଭେମ୍ବର ୧୩ ପର୍ଯ୍ୟନ୍ତ ଚିଲିକାର ବଡ଼କୂଳସ୍ଥିତ ଓଡ଼ିଆର୍ଟ ସେଣ୍ଟରରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଛି। ଚଳିତବର୍ଷ କାର୍ଯ୍ୟକ୍ରମରେ ପୁରଭା ଲୋକକଳା ଏବଂ ଆଦିବାସୀ କଳା ସଂଗ୍ରହାଳୟରେ ଏକ ନୂତନ ବ୍ଲକ୍ର ଉଦ୍ଘାଟନ କରାଯାଇଛି।
ଉତ୍ସବର ପ୍ରଥମ ଦିନ ନବଗୁଞ୍ଜର ପ୍ରତିମୂର୍ତ୍ତି ନିକଟରେ ଶପଥ ଗ୍ରହଣ ସମାରୋହ ସହିତ ଆରମ୍ଭ ହୋଇଥିଲା। ଏଥିରେ ଭିଏତନାମର କଳାକାରମାନେ ଅଂଶଗ୍ରହଣ କରିଥିଲେ। ଓଡ଼ିଆର୍ଟ ସେଣ୍ଟରର ପ୍ରତିଷ୍ଠାତା ସଦସ୍ୟ ପ୍ରସନ୍ନକୁମାର ଦାଶ, ସଭାପତି ପ୍ରଦୋଷ ସି.ମହାନ୍ତି, ସମ୍ପାଦକ ମାନସ ରଞ୍ଜନ ପଟ୍ଟନାୟକ ସ୍ୱାଗତ ଭାଷଣ ଦେଇଥିଲେ। ପୁରଭାଷା ସଂଗ୍ରହାଳୟର ନିର୍ଦ୍ଦେଶକ ତଥା ଗବେଷକ ଜିତୁ ମିଶ୍ର ଅଂଶଗ୍ରହଣକାରୀମାନଙ୍କୁ ସଂଗ୍ରହାଳୟର ଷୋହଳ ନମ୍ବର ଗ୍ୟାଲେରି ବୁଲାଇ ଦେଖାଇଥିଲେ।
ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଏବଂ ଖଣି ଓ ଇସ୍ପାତ ମନ୍ତ୍ରୀ ବିଭୂତିଭୂଷଣ ଜେନା ଯୋଗଦେଇ ଏକ ପଟ୍ଟଚିତ୍ର ପ୍ରଦର୍ଶନୀ ଏବଂ କୋରିଆ ଓ ଓଡ଼ିଶାର ବୌଦ୍ଧ ସ୍ମାରକୀ ଉପରେ ପର୍ଯ୍ୟବସିତ ଏକ ଫଟୋ ପ୍ରଦର୍ଶନୀର ଉଦ୍ଘାଟନ କରିଥିଲେ। ଉଦ୍ଘାଟନୀ ରାତିର ମୁଖ୍ୟ ଆକର୍ଷଣ ଥିଲା ଭିଏତନାମ ପରକୁସନ କଳାକାର ଏବଂ ପଶ୍ଚିମବଙ୍ଗର ପ୍ରସିଦ୍ଧ ଶ୍ରୀଖୋଲ ପର୍କୁସନ ଏନସେମ୍ବଲର ଚମତ୍କାର ପ୍ରଦର୍ଶନ।
ଓଡ଼ିଶାର ପଟ୍ଟଚିତ୍ର କଳା ଉପରେ ଏକ ପୁସ୍ତକ “ପଟ୍ଟଚିତ୍ରଟୁଡେ” ଉନ୍ମୋଚନ ହୋଇଥିଲା। ଆଡଭୋକେଟ ଜେନେରାଲ ପୀତାମ୍ବର ଆଚାର୍ଯ୍ୟ ଏବଂ ପ୍ରସନ୍ନ ଦାଶ ସାଂସ୍କୃତିକ ସେତୁ ପ୍ରତିଷ୍ଠା କରିବାରେ ସଂପୃକ୍ତ କାର୍ଯ୍ୟକ୍ରମର ଭୂମିକା ସଂପର୍କରେ ଆଲୋକପାତ କରିଥିଲେ। ଅତିଥିମାନେ ଓଡ଼ିଆର୍ଟ ପଟ୍ଟଚିତ୍ର ସମ୍ମାନ ୨୦୨୪ ପ୍ରଦାନ କରିଥିଲେ। ପ୍ରତ୍ୟେକ ଦିନ ଛାତ୍ରଛାତ୍ରୀମାନଙ୍କ ପାଇଁ କର୍ମଶାଳା ପ୍ରଦର୍ଶିତ ହେବ। ଗିରିଧର ଗମାଙ୍ଗୋଙ୍କ ସମେତ ମାଷ୍ଟର କଳାକାରମାନଙ୍କ ନିର୍ଦ୍ଦେଶନାରେ ପାରମ୍ପରିକ କଳା ସହିତ ଅଭିଜ୍ଞତା ପ୍ରଦାନ କରାଯିବ।
