ମୁମ୍ଵାଇ ୨୧।୧୦: ବିହାରର ଭୋଜପୁର ଜିଲ୍ଲାରୁ ଡ୍ରାମା ଏବଂ ସସ୍ପେନ୍ସ ଭରା ଏକ ଖବର ଚର୍ଚ୍ଚାର ବିଷୟ ହୋଇଛି । ସ୍ତ୍ରୀଙ୍କ ହତ୍ୟା ଦୋଷରେ ସ୍ୱାମୀ ୪ ବର୍ଷ ଜେଲରେ କାଟିବା ପରେ ସ୍ତ୍ରୀ ଜୀବିତ ଥିବା ଜାଣିବାକୁ ପାଇଛନ୍ତି । ଧର୍ମଶିଳା ନାମ୍ନୀ ମହିଳାଙ୍କୁ ତାଙ୍କ ସ୍ୱାମୀ ଦୀପକ ମାରପିଟ୍ କରିବା ପରେ ସେ ବାପଘରକୁ ପଳାଇଥିଲେ ।
ବାପ ଘରକୁ ଯିବାର ୨ ମାସ ପରେ ମହିଳାଙ୍କ ମା’ଙ୍କ ମୃତ୍ୟୁ ଘଟିଥିଲା । ପରେ ମହିଳା ଜଣଙ୍କ ତାଙ୍କ ବାପାଙ୍କ ଖରାପ ନଜରରୁ ବର୍ତ୍ତି ପାରି ନ ଥିଲେ । ସବୁଆଡ଼ୁ ହତାଶ ହୋଇ ମହିଳା ଜଣକ ଟ୍ରେନ୍ ଲାଇନକୁ ଯାଇ ଆତ୍ମହତ୍ୟା ଉଦ୍ୟମ କରିଥିଲେ । କିନ୍ତୁ ଜଣେ ବ୍ୟକ୍ତି ତାଙ୍କୁ ଆତ୍ମହତ୍ୟା କରିବାରୁ ରୋକିଥିଲେ । ସେହି ବ୍ୟକ୍ତି ଜଣଙ୍କୁ ମହିଳା ବିବାହ କରିଥିଲେ । ସେପଟେ ଝିଅକୁ ନ ପାଇ ବାପା ଅବଧ ବିହାରୀ ସିଂ ଥାନାରେ ଏତଲା ଦେଇଥିଲେ । ଜ୍ୱାଇଁ ତାଙ୍କ ଝିଅକୁ ହତ୍ୟା କରିଥିବା ମହିଳାଙ୍କ ବାପା ଅଭିଯୋଗରେ ଦର୍ଶାଇଥିଲେ ।
କିଛି ଦିନ ପରେ ୨୦୨୦ ଅକ୍ଟୋବର ୩୧ରେ ପୋଲିସକୁ ନଦୀକୂଳରୁ ଏକ ମୃତଦେହ ମିଳିଥିଲା । ସେହି ମୃତଦେହ ଧର୍ମଶିଳାଙ୍କର ବୋଲି ତାଙ୍କ ବାପା ଚିହ୍ନଟ କରିଥିଲେ । ଏହା ପରେ ପୋଲିସ ମହିଳାଙ୍କ ପ୍ରଥମ ସ୍ୱାମୀଙ୍କୁ ଗିରଫ କରିଥିଲା । ମାମଲା ଚାଲିବା ପରେ ପ୍ରଥମ ସ୍ୱାମୀଙ୍କୁ ହତ୍ୟା ଅଭିଯୋଗରେ କାରାଦଣ୍ଡାଦେଶ ହୋଇଥିଲା । ଏବେ ୪ ବର୍ଷ ପରେ ପୁଲିସକୁ ମହିଳା ଜଣକ ଜୀବିତ ଅବସ୍ଥାରେ ମିଳିଛନ୍ତି ।
