ମୁମ୍ଵାଇ ୦୨।୧୦: ମହାରାଷ୍ଟ୍ରର ଥାନେର ଏକ ଘରୋଇ ବିଦ୍ୟାଳୟରେ ମଧ୍ୟାହ୍ନ ଭୋଜନ କରିବା ପରେ ୩୮ ପିଲା ଅସୁସ୍ଥ ହୋଇପଡିଛନ୍ତି। ଏହି ଘଟଣା ପରେ ସମସ୍ତ ଶିଶୁଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଏନେଇ ଅଧିକାରୀମାନେ ଏହି ସୂଚନା ପ୍ରଦାନ କରିଥିଲେ। କାଲୱା ସହରର ସିଭିଲ୍ ହସ୍ପିଟାଲର ଡାକ୍ତରଙ୍କ ଅନୁଯାୟୀ, ୮ରୁ ୧୧ ବର୍ଷ ବୟସର ଏହି ପିଲାମାନଙ୍କୁ ମଧ୍ୟାହ୍ନ ଭୋଜନ ପରେ ମୁଣ୍ଡ ବୁଲାଇବା, ବାନ୍ତି, ମୁଣ୍ଡବିନ୍ଧା ଏବଂ ପେଟ ଯନ୍ତ୍ରଣା ଅଭିଯୋଗ ହେବା ପରେ ଭର୍ତ୍ତି କରାଯାଇଥିଲା।
ଥାନେ ମ୍ୟୁନିସିପାଲିଟି କର୍ପୋରେସନ୍ (ଟିଏମସି) ଅତିରିକ୍ତ କମିଶନର କହିଛନ୍ତି ଯେ ସମସ୍ତ ପିଲାଙ୍କ ସ୍ଵାସ୍ଥ୍ୟାବସ୍ଥା ସ୍ଥିର ଅଛି ଏବଂ ସେମାନଙ୍କ ଚିକିତ୍ସା ଚାଲିଛି। ସେ ନିଶ୍ଚିତ କରିଛନ୍ତି ଯେ ପିଲାମାନେ ବିଦ୍ୟାଳୟରେ ମଧ୍ୟାହ୍ନ ଭୋଜନ କରିଥିଲେ। ଯାହା ପରେ ସେମାନଙ୍କ ସ୍ଵାସ୍ଥ୍ୟାବସ୍ଥା ଖରାପ ହୋଇଥିଲା। ଅନ୍ୟ ଜଣେ ଡାକ୍ତରୀ ଅଧିକାରୀ କହିଛନ୍ତି ଯେ ଛାତ୍ରଛାତ୍ରୀମାନଙ୍କୁ ଭୋଜନରେ ଭାତ ଏବଂ ବିନ୍ ତରକାରୀ ପରିବେଷଣ କରାଯାଇଥିଲା।
ଖାଦ୍ୟ ନମୁନା ନିଆଯାଇଛି
ଅଧିକାରୀମାନେ କହିଛନ୍ତି, “ପିଲାମାନଙ୍କୁ ଦିଆଯାଉଥିବା ଖାଦ୍ୟର ନମୁନା ଖାଦ୍ୟ ଏବଂ ଔଷଧି ପ୍ରଶାସନ (ଏଫଡିଏ) ଅଧିକାରୀଙ୍କ ଦ୍ଵାରା ନିଆଯାଇଛି। ବର୍ତ୍ତମାନ ସୁଦ୍ଧା ଏହା ଜଣା ପଡିନାହିଁ ଯେ ବିନ୍ ତରକାରୀ ବାସି ଥିଲା କି ନାହିଁ?” ଅଧିକାରୀଙ୍କ ଅନୁଯାୟୀ, ପ୍ରଥମେ ପାଞ୍ଚ ଜଣ ପିଲା ଅଣନିଶ୍ଵାସ ହୋଇଥିଲେ ଏବଂ ଧୀରେ ଧୀରେ ସ୍ଵାସ୍ଥ୍ୟ ଖରାପ ହେବାର ସଂଖ୍ୟା ବୃଦ୍ଧି ପାଇଲା।
ଏହା ପରେ ସ୍କୁଲ ପ୍ରଶାସନ ଆମ୍ବୁଲାନ୍ସକୁ ଡାକି ପିଲାମାନଙ୍କୁ ଡାକ୍ତରଖାନା ନେଇଥିଲା। ପିଲାମାନଙ୍କର ପରିବାର ସଦସ୍ୟ ମଧ୍ୟ ଡାକ୍ତରଖାନାରେ ଉପସ୍ଥିତ ଅଛନ୍ତି। ଏହି ସମୟରେ କାଲୱା ହସ୍ପିଟାଲର ଡିନ୍ ଅନିରୁଦ୍ଧ ମାଲଗାଓଁକାର କହିଛନ୍ତି ଯେ ସ୍କୁଲ ଖାଦ୍ୟରେ ଫୁଡ୍ ପଜନିଂ ହେବାର ସନ୍ଦେହ ରହିଛି। ସମସ୍ତ ଛାତ୍ରଙ୍କ ଅବସ୍ଥା ସ୍ଥିର ରହିଛି
