ଭାରତକୁ ଖୁସି କରିବାକୁ ୟୁନୁସ୍ ସରକାରଙ୍କ କୂଟନୀତି: ଇଲିସି ମାଛ ରପ୍ତାନୀ ଉପରୁ କଟକଣା ଉଠାଇଲା ବାଂଲାଦେଶ

ମହମ୍ମଦ ୟୁନୁସ ସରକାର ଚଳିତବର୍ଷ ଘରୋଇ ବଜାରରେ କାରବାର ବଢାଇବା ପାଇଁ ଭାରତକୁ ଇଲିସି ମାଛ ରପ୍ତାନୀ ଉପରେ କଟକଣା ଲଗାଇବାକୁ ନିଷ୍ପତ୍ତି ନେଇଥିଲେ। ଦୁର୍ଗାପୂଜା ସହିତ ଅନ୍ୟ ପର୍ବପର୍ବାଣୀରେ ଭାରତର ପୂର୍ବାଞ୍ଚଳ ରାଜ୍ୟରେ ଇଲିସି ମାଛର ଚାହିଦା ବଢ଼ିଥାଏ। ବାଂଲାଦେଶର ବାଣିଜ୍ୟ ମନ୍ତ୍ରଣାଳୟର ସୂଚନାନୁସାରେ, ଆଗାମୀ ଦୁର୍ଗାପୂଜା ଅବସରରେ ୩ ହଜାର ମେଟ୍ରିକ ଟନ୍ ଇଲିସି ମାଛ ରପ୍ତାନୀକୁ ମଞ୍ଜୁର ଦିଆଯାଇଛି। ବାଲାଂଦେଶ ସରକାରଙ୍କ ଏହି ପଦକ୍ଷେପ ଫଳରେ ପଦ୍ମ ନଦୀର ଇଲିସି ପାଇଁ ଭାରତୀୟଙ୍କ ଅପେକ୍ଷା ଶେଷ ହେବାକୁ ଯାଉଛି। ବାଂଲାଦେଶ ସରକାର ଏ ସମ୍ପର୍କରେ ଏକ ବିଜ୍ଞପ୍ତି ଜାରି କରିସାରିଛନ୍ତି।
‘ମତ୍ସ୍ୟ ଆମଦାନୀ ଆସୋସିଏସନ୍’ର ସମ୍ପାଦକ ସୟଦ ଅନୱାର ମକସୁଦ କହିଛନ୍ତି ଯେ , ଇଲିସି ମାଛ ନିଶ୍ଚିତ ଭାବେ ଆସୁଛି। ତେବେ ମାଛର ଦର କେତେ ହେବ ତାହା କହିବା ସମ୍ଭବ ନୁହେଁ। ଇଲିସିର ମୂଲ୍ୟ ଆକାଶଛୁଆଁ ହୋଇସାରିଛି। ଯଦି ଅଧିକ ମାଛ ଆସେ, ତେବେ ଦର କମ୍ ହେବ। ନଚେତ୍ ଦର ଅଧିକ ହେବ। ଅନୁମତି ୩,୦୦୦ ମେଟ୍ରିକ୍ ଟନ୍ ପାଇଁ ମିଳିଥିଲେ ମଧ୍ୟ ୧,୫୦୦ ମେଟ୍ରିକ୍ ଟନ୍ ଇଲିସି ଆସିବାର ସମ୍ଭାବନା ରହିଛି। ଭାରତ ବାଂଲାଦେଶର କଷ୍ଟଦାୟକ ସମୟରେ ଠିଆ ହୋଇଛି। ବାଂଲାଦେଶରେ ଜନ ଆନ୍ଦୋଳନ ପରେ ସେଠାରେ ଅତ୍ୟାବଶ୍ୟକ ସାମଗ୍ରୀର ମୂଲ୍ୟ ଅତ୍ୟଧିକ ବୃଦ୍ଧି ପାଇଥିଲା। ଏହି ଖରାପ ସମୟରେ ବାଂଲାଦେଶକୁ ଭାରତ ପିଆଜ, ଆଳୁ ଏବଂ ଅଣ୍ଡା ପଠାଇଛି।