ନୂଆଦିଲ୍ଲୀ/ବେଜିଂ: ଶତାବ୍ଦୀର ସବୁଠାରୁ ବଡ଼ ଝଡ଼ ଚୀନ୍ରେ ଆସିଛି। ଏହାର ନାମ ୟାଗି ରଖାଯାଇଛି। ଏହି ଝଡ଼ ଯୋଗୁ ପ୍ରଥମେ ଫିଲିପାଇନ୍ସରେ ୧୬ ଜଣଙ୍କର ମୃତ୍ୟୁ ଘଟିଥିଲା ଏବଂ ବର୍ତ୍ତମାନ ଏହା ଚୀନ୍ ଆଡକୁ ଗତି କରୁଛି। ଭାରତ ପ୍ରଶାନ୍ତ ମହାସାଗରରୁ ଉତ୍ପନ୍ନ ଏହି ସାଇକ୍ଲୋନିକ୍ ଝଡ଼ ଚୀନ୍ର ଦକ୍ଷିଣ ଉପକୂଳରେ ପହଞ୍ଚିଛି। ଝଡ଼ ଯୋଗୁ ଘଣ୍ଟା ପ୍ରତି ପ୍ରାୟ ୩୫୦ କିଲୋମିଟର ବେଗରେ ପବନ ବହୁଛି।
ଚୀନ୍ ରେଡ୍ ଆଲର୍ଟରେ ଅଛି ଏବଂ ସରକାର ହେନାନ ପ୍ରଦେଶକୁ ଖାଲି କରିବାକୁ ନିର୍ଦ୍ଦେଶ ଦେଇଛନ୍ତି।
ପ୍ରାୟ ୫ ଲକ୍ଷ ଲୋକଙ୍କୁ ପ୍ରଦେଶରୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଗତକାଲି ଟାଇଫୁନ୍ ୟାଗି ହେନାନର ୱେଞ୍ଚାଙ୍ଗ ସହରରେ ଲ୍ୟାଣ୍ଡ ଫଲ୍ କରିଥିଲା। ଏହାର ପ୍ରଭାବରେ ତୁହା କୁ ତୁହା ବର୍ଷା ଲାଗି ରହିଥିଲା।
ପ୍ରବଳ ବେଗରେ ବହୁଥିବା ପବନ ଚାଣ୍ଡବ ରଚିଛି। ବର୍ତ୍ତମାନ ହେନାନ ପ୍ରଦେଶରେ ଜନସାଧାରଣଙ୍କ ସ୍ବାଭାବିକ ଜୀବନ ଠପ୍ ହୋଇ ଯାଇଛି। ବିଦ୍ୟାଳୟ ଓ କଲେଜଗୁଡ଼ିକ ବନ୍ଦ ରହିଛି । ରେଳ, ସଡ଼କ ଏବଂ ବିମାନ ସେବା ବନ୍ଦ କରାଯାଇଛି। ଚୀନ୍ର ଅଫିସିଆଲ୍ ନ୍ୟୁଜ୍ ଏଜେନ୍ସି ଜିନହୁଆର ରିପୋର୍ଟ ଅନୁଯାୟୀ, ଏହି ଝଡ଼ର ବେଗ କ୍ରମାଗତ ଭାବେ ବୃଦ୍ଧି ପାଇବାରେ ଲାଗିଛି ଏବଂ ଏହା ହେନାନ ଏବଂ ଗୁଆଙ୍ଗଡୋଙ୍ଗ ପ୍ରଦେଶ ଦେଇ ବେଇବୁ ଗଲ୍ଫ ଆଡକୁ ମୁହାଁଇବାର ସମ୍ଭାବନା ରହିଛି।
ଭାରତୀୟ ପାଣିପାଗ ବିଜ୍ଞାନୀମାନେ ଆଶଙ୍କା ବ୍ୟକ୍ତ କରିଛନ୍ତି ଯେ ଚୀନ୍ର ସୁପର ଟାଇଫୁନ୍ ୟାଗି ଭାରତ ଉପରେ ମଧ୍ୟ ପ୍ରଭାବ ପକାଇପାରେ। ଏହି କାରଣରୁ ଦେଶର ଅନେକ ରାଜ୍ୟରେ ପ୍ରବଳ ବର୍ଷା ହୋଇପାରେ। ବିଶେଷକରି କର୍ଣ୍ଣାଟକ, କେରଳ, ଗୁଜୁରାଟ, ମହାରାଷ୍ଟ୍ର, ତେଲେଙ୍ଗାନା, ଆନ୍ଧ୍ରପ୍ରଦେଶ ଇତ୍ୟାଦି ଉପକୂଳବର୍ତ୍ତୀ ରାଜ୍ୟଗୁଡିକରେ ଆସନ୍ତା ସପ୍ତାହରେ ପ୍ରବଳ ବର୍ଷା ହେବାର ସମ୍ଭାବନା ରହିଛି।
ଏହି ସମୟରେ ଭାରତର ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ଘଣ୍ଟା ପ୍ରତି ୫୦ ରୁ ୬୦ କିଲୋମିଟର ବେଗରେ ପବନ ମଧ୍ୟ ପ୍ରବାହିତ ହୋଇପାରେ । ଏହି ରାଜ୍ୟଗୁଡିକରେ ବର୍ଷାର ପ୍ରଭାବ ଅନ୍ୟ ରାଜ୍ୟରେ ମଧ୍ୟ ଦେଖିବାକୁ ମିଳିବାର ସମ୍ଭାବନା ରହିଛି। ତେଣୁ ସେପ୍ଟେମ୍ବର ୧୫ ପର୍ଯ୍ୟନ୍ତ ଉତ୍ତରାଖଣ୍ଡ, ଉତ୍ତରପ୍ରଦେଶ, ଦିଲ୍ଲୀ ସମେତ ଅନେକ ରାଜ୍ୟରେ ବର୍ଷା ହେବାର ପୂର୍ବାନୁମାନ ପାଣିପାଗ ବିଭାଗ ପକ୍ଷରୁ କରାଯାଇଛି।
