ଲକ୍ଷ୍ନୌ: କନ୍ନୌଜରେ ସମାଜବାଦୀ ପାର୍ଟି (ଏସପି) ନେତା ତଥା ପୂର୍ବତନ ବ୍ଲକ ମୁଖ୍ୟ ନବାବ ସିଂ ଯାଦବଙ୍କ ଡିଏନଏ ନମୁନା ନାବାଳିକା ଦୁଷ୍କର୍ମ ପୀଡିତାଙ୍କ ସହ ମେଳ ଖାଇଛି ଏବଂ ଏହାଦ୍ୱାରା ଦୁଷ୍କର୍ମ ପ୍ରମାଣିତ ହୋଇଛି। ଫୋରେନସିକ୍ ପରୀକ୍ଷା ରିପୋର୍ଟରେ ଏହା ପ୍ରକାଶ ପାଇଛି, ଯେଉଁଥିପାଇଁ ନବାବ ସିଂଙ୍କ ସମସ୍ୟା ବଢ଼ିଛି। ବର୍ତ୍ତମାନ ପୁଲିସ୍ ତାଙ୍କ ବିରୋଧରେ ପୋକ୍ସୋ ଅଧିନିୟମ ଅନୁଯାୟୀ ଚାର୍ଜସିଟ ଦାଖଲ କରିବ।
ଅଗଷ୍ଟ ୧୧ ରାତିରେ ନବାବ ସିଂ ଯାଦବ କନ୍ନୌଜରେ ଜଣେ ନାବାଳିକାକୁ ଦୁଷ୍କର୍ମ କରିଥିଲେ। ପୀଡିତା ଜଣକ ୧୧୨ ନମ୍ବରକୁ କଲ କରି ଘଟଣା ସମ୍ପର୍କରେ ପୁଲିସ୍କୁ ସୂଚନା ଦେଇଥିଲେ। ପୁଲିସ୍ ଘଟଣାସ୍ଥଳରେ ପହଞ୍ଚି ପୀଡିତାଙ୍କ ପୀଉସୀଙ୍କୁ ଗିରଫ କରି ପଚରାଉଚରା କରିଥିଲା। ସୂଚନାଯୋଗ୍ୟ, ନବାବ ଯାଦବ ଅଖିଳେଶ ଏବଂ ତାଙ୍କ ପତ୍ନୀ ଡିମ୍ପଲଙ୍କ ଅତି ନିକଟତର ବୋଲି ବିବେଚନା କରାଯାଏ। ଏହି ନବାବ ଡିମ୍ପଲ୍ ଯାଦବଙ୍କ ପ୍ରତିନିଧୀ ମଧ୍ୟ ରହିଛନ୍ତି।
ପୀଡିତାଙ୍କ ଅଭିଯୋଗ ଉପରେ ପୁଲିସ୍ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରିଥିଲା। ଏହି ମାମଲାରେ ଦ୍ୱିତୀୟ ଅଭିଯୁକ୍ତ ହେଉଛନ୍ତି ନାବାଳିକାଙ୍କ ସହ ଲକ୍ଷ୍ନୌରୁ ନବାବ ସିଂଙ୍କ ନିକଟକୁ ଆସିଥିବା ପୀଡିତାଙ୍କ ପୀଉସୀ। ଘଟଣା ସମୟରେ ସେ କୋଠରୀ ବାହାରେ ଉପସ୍ଥିତ ଥିଲେ ମଧ୍ୟ ପୀଡିତାଙ୍କୁ ସାହାଯ୍ୟ କରି ନ ଥିଲେ। ପୋଲିସ ଉଭୟଙ୍କୁ ଗିରଫ କରିଛି।
ପଚରାଉଚରା ବେଳେ ପୀଡିତାଙ୍କ ପୀଉସୀ କହିଥିଲେ ଯେ ସେ ଗତ ୫-୬ ବର୍ଷ ଧରି ନବାବ ସିଂଙ୍କୁ ଜାଣିଥିଲେ ଏବଂ ତାଙ୍କ ସହ ଶାରୀରିକ ସମ୍ପର୍କ ମଧ୍ୟ ରଖିଥିଲେ। ସେ ଏହା ପୂର୍ବରୁ ପୁଲିସ୍କୁ ବିଭ୍ରାନ୍ତ କରିବାକୁ ଚେଷ୍ଟା କରିଥିଲେ ଏବଂ ନବାବ ସିଂଙ୍କୁ ମିଛରେ ଅଭିଯୁକ୍ତ କରାଯାଉଥିବା କହିଥିଲେ।
