ଚିକିତ୍ସାରେ ଅର୍ଥ ସାଜିଛି ବାଧକ, କ୍ୟାନ୍ସର ରୋଗରେ ଛଟ ପଟ ଶ୍ରାବଣୀ

ସୂଚନା ମୁତାବକ, ଆଜକୁ ୨୦ବର୍ଷ ତଳେ ଶ୍ରାବଣୀ ତାଙ୍କ ସ୍ୱାମୀ ଢିନ ମାଝି ସହ କୁଲି ମଜୁରୀ କରି ତାଙ୍କ ଦୁଇ ସନ୍ତାନ ସହ ବେଶ ହସ ଖୁସିରେ ଦିନ କାଟୁଥିଲେ । ୫ ବର୍ଷ ତଳେ ଶ୍ରାବଣୀର ଭାଗ୍ୟରେ ହଠାତ ମାଡି ଆସିଲା ଦୁଃଖର କଳାବାଦଲ l ସ୍ୱାମୀ ଢିନ ମାଝିଙ୍କ ମାନସିକ ଖରାପ ହେବା ସହ ସେ ଆତ୍ମହତ୍ୟା କରି ସବୁଦିନ ପାଇଁ ତିନୋଟି ପ୍ରାଣୀକୁ ଛାଡି ଆରପାରିକୁ ଚାଲିଗଲେ l ଏଥିରେ ଭାଙ୍ଗି ନ ପଡ଼ି ଶ୍ରାବଣୀ ଛାତିରେ ଦମ୍ଭ କରି କୁଲି ମଜୁରୀ କରି ତାଙ୍କ ଦୁଇ ଛୁଆର ମୁହଁରେ ଦାନା ଦେଉଥିଲେ l

ଶ୍ରାବଣୀର ମୁହଁ ରେ ହଠାତ ଏକ ଛୋଟ ଟ୍ୟୁମର ଦେଖା ଦେଇଥିଲା l ଏହା ଅତ୍ୟନ୍ତ ଯନ୍ତ୍ରଣା ଦାୟକ ହେବାରୁ ଚନ୍ଦାହାଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେବା ସତ୍ବେ ଏହା କମିବା ବଦଳରେ ବଢ଼ିବାକୁ ଲାଗିବାରୁ ପାଖରେ ଅର୍ଥ ଅଭାବ ଦେଖାଦେଇଛି । ଫଳରେ କୌଣସି ବଡ଼ ଡାକ୍ତରଖାନା ଯାଇ ନ ପାରି ଦେଶୀ ଚିକିତ୍ସା ସହ ଝଡା ଫୁଙ୍କା ଚିକିତ୍ସା କରାଇବାରୁ ଟ୍ୟୁମର ଫାଟି ପାଟି କଣା ହୋଇଯାଇଛି l ପରେ ବିଜୁ ସ୍ୱାସ୍ଥ୍ୟ କାର୍ଡ ସହାୟତାରେ ରାୟପୁର ଯାଇ ଚିକିତ୍ସିତ ହୋଇଥିଲେ ମଧ୍ୟ ରୋଗ କମି ନ ଥିଲା l

ବର୍ତ୍ତମାନ ସେ ଚିକିତ୍ସା ଅଭାବରେ ଦିନ ରାତି ଯନ୍ତ୍ରଣାରେ ଛଟପଟ ହେଉଛନ୍ତି lଦୁଇ ପୁଅ ଝିଅ ପାଠ ପଢା ଛାଡି ବାହାରେ କାମ ଧନ୍ଧା କରି ମା’ର ମୁହଁରେ ଦାନା ଦେବା ସହ ସେବା ଶୁଶ୍ରୁସା କରୁଛନ୍ତି l ତାଙ୍କର ଜମିବାଡ଼ି ମଧ୍ୟ ନାହିଁ l ସରକାରୀ ସାହାଯ୍ୟ କହିଲେ ଶ୍ରାବଣୀକୁ ମାସିକ ୧୦୦୦ଟଙ୍କା ବିଧବା ଭତ୍ତା ଏବଂ ମୁଣ୍ଡ ପିଛା ମାସକୁ ୫କେଜି ଚାଉଳ ଏଥିରୁ ମଧ୍ୟ ଅଧା ବିକି ଔଷଧ କିଣୁଛନ୍ତି l ରହିବାକୁ ଘର ଖଣ୍ଡିକ ମଧ୍ୟ ନାହିଁ । ପୁରୁଣା କାଳିଆ ଝାଟି ମାଟି ଘରେ ଜୀବନ ବିତାଉଛନ୍ତି ୩ ପ୍ରାଣୀ l ଏ ଦିଗରେ ଜିଲ୍ଲାପାଳ ସ୍ୱତନ୍ତ୍ର ଦୃଷ୍ଟି ଦେଇ ଶ୍ରାବଣୀକୁ ଚିକିତ୍ସା ସହାୟତା ଯୋଗାଇ ଦେବାକୁ ବିଭିନ୍ନ ମହଲରେ ଦାବି କରାଯାଇଛି l