ରାହୁଲ ଭାରତୀୟ ନାଗରିକ ନୁହଁନ୍ତି, ନାଗରିକତ୍ୱ ରଦ୍ଦ କରନ୍ତୁ: କୋର୍ଟ ପହଞ୍ଚିଲେ ସୁବ୍ରମଣ୍ୟମ ସ୍ବାମୀ, ଆସନ୍ତା ସପ୍ତାହରେ ଶୁଣାଣି
ନୂଆଦିଲ୍ଲୀ: ଲୋକସଭାରେ କଂଗ୍ରେସ ସାଂସଦ ତଥା ବିରୋଧୀ ଦଳର ନେତା ରାହୁଲ ଗାନ୍ଧୀ ପୁଣି ଥରେ ଚର୍ଚ୍ଚାର ପରିସରକୁ ଆସିଛନ୍ତି। କାରଣ ପୂର୍ବତନ ରାଜ୍ୟସଭା ସାଂସଦ ଡ.ସୁବ୍ରମଣ୍ୟମ ସ୍ବାମୀ ଦିଲ୍ଲୀ ହାଇକୋର୍ଟରେ ଆବେଦନ କରି ରାହୁଲଙ୍କ ଭାରତୀୟ ନାଗରିକତ୍ୱ ରଦ୍ଦ କରିବାକୁ ଦାବି କରିଛନ୍ତି।
ରାହୁଲଙ୍କ ନାଗରିକତ୍ୱ ରଦ୍ଦ କରିବାକୁ ଗୃହମନ୍ତ୍ରଣାଳୟକୁ ନିର୍ଦ୍ଦେଶ ଦେବାକୁ ସେ କୋର୍ଟଙ୍କୁ ଅନୁରୋଧ କରିଛନ୍ତି।
ଆସନ୍ତା ସପ୍ତାହରେ ଦିଲ୍ଲୀ ହାଇକୋର୍ଟରେ ଏହି ଆବେଦନର ଶୁଣାଣି କରିବାର ସମ୍ଭାବନା ରହିଛି।
ସ୍ବାମୀ ତାଙ୍କ ଆବେଦନରେ କହିଛନ୍ତି ଯେ ପାଞ୍ଚ ବର୍ଷ ପୂର୍ବେ ସେ ଗୃହମନ୍ତ୍ରଣାଳୟକୁ ଏ ସମ୍ପର୍କରେ ଅଭିଯୋଗ କରିଥିଲେ ମଧ୍ୟ ଏପର୍ଯ୍ୟନ୍ତ ମନ୍ତ୍ରଣାଳୟ ଏ ସମ୍ପର୍କରେ କୌଣସି ନିଷ୍ପତ୍ତି ନେଇ ନାହିଁ। ଏହି ଅଭିଯୋଗ ଉପରେ ଏପର୍ଯ୍ୟନ୍ତ ନିଆଯାଇଥିବା କାର୍ଯ୍ୟର ସ୍ଥିତି ରିପୋର୍ଟ ଉପସ୍ଥାପନ କରିବାକୁ ଗୃହ ମନ୍ତ୍ରଣାଳୟକୁ ନିର୍ଦ୍ଦେଶ ଦେବାକୁ ସେ କୋର୍ଟଙ୍କୁ ଅନୁରୋଧ କରିଛନ୍ତି।
ପ୍ରକୃତରେ, ଜଣେ ବ୍ୟକ୍ତି ଆରଟିଆଇ ମାଧ୍ୟମରେ ରାହୁଲ ଗାନ୍ଧୀଙ୍କ ନାଗରିକତ୍ୱ ସମ୍ପର୍କରେ ସୂଚନା ମାଗିଥିଲେ। କିନ୍ତୁ ଗୃହମନ୍ତ୍ରଣାଳୟ ଆରଟିଆଇ ଆକ୍ଟର ଧାରା ୮ ((ଏଚ) ଏବଂ (ଜେ) କୁ ଦର୍ଶାଇ ମନା କରିଦେଇଥିଲେ। ଏସମ୍ବନ୍ଧରେ ସୂଚନା ଦେବା ଦ୍ବାରା ଯାଞ୍ଚ୍ ପ୍ରକ୍ରିୟାରେ ବାଧା ସୃଷ୍ଟି ହୋଇପାରେ ବୋଲି ଗୃହମନ୍ତ୍ରଣାଳୟ କହିଥିଲେ।
ତେବେ ତତ୍କାଳୀନ ପ୍ରଧାନ ବିଚାରପତି ରଞ୍ଜନ ଗୋଗୋଇଙ୍କ ନେତୃତ୍ୱରେ ଏକ ବେଞ୍ଚ ଏହି ଆବେଦନକୁ ଖାରଜ କରିଥିଲେ। ଜଷ୍ଟିସ ଗୋଗୋଇ କହିଥିଲେ ଯେ ଯଦି କୌଣସି କମ୍ପାନି ରାହୁଲ ଗାନ୍ଧୀଙ୍କୁ ବ୍ରିଟିଶ ନାଗରିକ ଭାବରେ କୌଣସି ପ୍ରକାରେ ଘୋଷଣା କରନ୍ତି, ତେବେ ଏହାର ଅର୍ଥ ନୁହେଁ ଯେ ସେ ବ୍ରିଟିଶ ହୋଇଛନ୍ତି। ଏହି ବିବାଦ ଉପରେ ରାହୁଲ ଗାନ୍ଧୀଙ୍କ ଭଉଣୀ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ କହିଥିଲେ ଯେ ରାହୁଲ ଭାରତରେ ଜନ୍ମଗ୍ରହଣ କରିଛନ୍ତି ଏବଂ ସେ ଜଣେ ଭାରତୀୟ।
