ଲଦାଖରେ ସିଙ୍କୁ ଲା ଟନେଲର ଶିଳାନ୍ୟାସ କଲେ ପିଏମ ମୋଦୀ, ଜାଣନ୍ତୁ ଏହାର ବିଶେଷତ୍ବ…
![](https://kalinganews.com/wp-content/uploads/2024/07/f4288782eadd0aeea00038629beb96d61c56a7a894c3ebb3574c69641e8bc111-780x470.webp)
ନୂଆଦିଲ୍ଲୀ: ପ୍ରଧାନମନ୍ତ୍ରୀ ମୋଦୀ ଆଜି (ଶୁକ୍ରବାର) ଲଦାଖରେ ସିଙ୍କୁ ଲା ଟନେଲ ପ୍ରକଳ୍ପର ଶିଳାନ୍ୟାସ କରିଛନ୍ତି । ଏହି ପ୍ରକଳ୍ପ ଅଧୀନରେ ୪.୧ କିଲୋମିଟର ଲମ୍ବା ଦୁଇଟି ସମାନ୍ତରାଳ ଟନେଲ ନିର୍ମାଣ ହେବ । ଏହାର ନିର୍ମାଣ ନିମୁ-ପଦୁମ-ଦାରଚା ରାସ୍ତାରେ ପ୍ରାୟ ୧୫ ହଜାର ୮୦୦ ଫୁଟ ଉଚ୍ଚରେ କରାଯିବ । ହିମାଚଳ ପ୍ରଦେଶ ଏବଂ ଲଦାଖ ମଧ୍ୟରେ ସଂଯୋଗ ବୃଦ୍ଧିରେ ଏହା ଏକ ମାଇଲଖୁଣ୍ଟ ବୋଲି ପ୍ରମାଣିତ ହେବ ।
ସିଙ୍କୁ ଲା ଟନେଲ୍ ପ୍ରକଳ୍ପ ଆଗାମୀ ୨ ବର୍ଷ ମଧ୍ୟରେ ଶେଷ ହେବ ବୋଲି ଆଶା କରାଯାଉଛି । ଏହି ଟନେଲର ନିର୍ମାଣ ହେଲେ ଏହାର ବିଶ୍ୱର ସର୍ବୋଚ୍ଚ ଟନେଲର ଆଖ୍ୟା ପାଇବ, ଯାହାକି ଚାଇନାର ଏମଆଇଲା ଟନେଲ ଠାରୁ ଏହି ଆଖ୍ୟା ଛଡ଼ାଇ ଆଣିବ । ଚାଇନାର ଏମଆଇଲା ଟନେଲ୍ ଉଚ୍ଚତା ୧୫୫୯୦ ଫୁଟ ଉଚ୍ଚରେ ରହିଛି ।
ସିଙ୍କୁ ଲା ଟନେଲ ନିର୍ମାଣ ହେଲେ ହିମାଚଳରୁ ଲେହ ପର୍ଯ୍ୟନ୍ତ ସଂଯୋଗ ବର୍ଷର ୧୨ ମାସ ଉପଲବ୍ଧ ହେବ । ଏହି ଟନେଲ ନିର୍ମାଣ ପାଇଁ ପ୍ରାୟ ୧୬୮୧ କୋଟି ଟଙ୍କା ଖର୍ଚ୍ଚ ହେବ । ଏହାର ନିର୍ମାଣ ଦାୟିତ୍ ସେନା ଅଧୀନରେ କାର୍ଯ୍ୟ କରୁଥିବା ସୀମା ସଡକ ସଂଗଠନ ବା ବର୍ଡର ରୋଡ୍ ଅର୍ଗାନାଇଜେସନକୁ ଦିଆଯାଇଛି ।
ଏହି ଟ୍ବିନ ଟନେଲରେ ପ୍ରତ୍ୟେକ ୫ଶହ ମିଟରରେ କ୍ରସ୍-ପାସ୍ ସୁବିଧା ଉପଲବ୍ଧ ହେବ, ଯେଉଁଥିପାଇଁ ଏହା ଦେଇ ଯିବା ନିରାପଦ ହେବ । ହିମାଚଳ-ଲେହରେ ଉଭୟ ନାଗରିକ ଏବଂ ସାମରିକ ଆବଶ୍ୟକତା ପୂରଣ କରିବା ପାଇଁ ଏହା କାର୍ଯ୍ୟ କରିବ ।
ଏହି ଟନେଲର ନିର୍ମାଣ ସହିତ ହିମାଚଳ ଏବଂ ଲେହ ମଧ୍ୟରେ ଦୂରତା ୧୦୦ କିଲୋମିଟର ହ୍ରାସ ପାଇବ । ଏହା ସହିତ, ଆପଣ ଯେକୌଣସି ଋତୁରେ ହିମାଚଳ ମାଧ୍ୟମରେ ଲେହକୁ ପରିଦର୍ଶନ କରିବାକୁ ସମର୍ଥ ହେବେ । ଏହି ଟନେଲ୍ କେବଳ ଲେହରେ ବିକାଶର ଦ୍ୱାର ଖୋଲିବ ନାହିଁ ବରଂ ସେଠାରେ ଥିବା ପର୍ଯ୍ୟଟନ ଶିଳ୍ପକୁ ମଧ୍ୟ ନୂଆ ଆଶା ଦେଖାଇବ ।
ଦେଶର ସୁରକ୍ଷା ପାଇଁ ସିଙ୍କୁ ଲା ଟନେଲ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି । ଏହା ସହିତ ଭାରତ ଯେକୌଣସି ସମୟରେ ସିଆଚେନ୍, କାର୍ଗିଲ୍ ଏବଂ LAC ପର୍ଯ୍ୟନ୍ତ ନିଜର ସୈନ୍ୟ ଏବଂ ଅସ୍ତ୍ରଶସ୍ତ୍ର ନିୟୋଜିତ କରିବାରେ ସକ୍ଷମ ହେବ।