[ad_1]
ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ତଥା ବିଜେପିର ବରିଷ୍ଠ ନେତା ଜେପି ନଡ୍ଡାଙ୍କୁ ଆଉ ଏକ ଗୁରୁତ୍ୱପୂର୍ଣ୍ଣ ଦାୟିତ୍ବ ଦିଆଯାଇଛି। ତାଙ୍କୁ ରାଜ୍ୟସଭାର ଗୃହର ନେତା ଭାବେ ନିଯୁକ୍ତି ଦିଆଯାଇଛି। ଏହି ଭୂମିକାରେ ନଡ୍ଡା ପୀୟୁଷ ଗୋୟଲଙ୍କ ସ୍ଥାନ ନେଇଛନ୍ତି। ନଡ୍ଡା ବର୍ତ୍ତମାନ ସମୟରେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ମଧ୍ୟ ଅଛନ୍ତି। ସେ ଚଳିତ ମାସରେ କେନ୍ଦ୍ର ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ଫଳରେ ଏବେ ନଡ୍ଡା ୩ଟି ପଦବୀରେ ରହିଛନ୍ତି। ଅନୁମାନ କରାଯାଉଥିଲା ଦଳର ରାଷ୍ଟ୍ରୀୟ ଅଧ୍ୟକ୍ଷ ପଦର ଦାୟିତ୍ୱ ଅନ୍ୟ କାହାକୁ ଦିଆଯିବ। କିନ୍ତୁ, ଏବେ ଚର୍ଚ୍ଚା ହେଉଛି ନଡ୍ଡା ଦଳର ଅଧ୍ୟକ୍ଷ ରହିବେ।
Sambad is now on WhatsApp
Join and get latest news updates delivered to you via WhatsApp
ବିଜେପିର ନିୟମ ଅନୁଯାୟୀ, ପ୍ରତ୍ୟେକ ରାଜ୍ୟରେ ସାଂଗଠନିକ ନିର୍ବାଚନର ୫୦ ପ୍ରତିଶତ ସମାପ୍ତ ହେବା ପରେ ଦଳର ରାଷ୍ଟ୍ରୀୟ ଅଧ୍ୟକ୍ଷ ନିର୍ବାଚିତ ହୋଇପାରିବେ। ଏହା ହେବା ପାଇଁ ପ୍ରାୟ ୬ମାସ ସମୟ ଲାଗିପାରେ ବୋଲି କୁହା ଯାଉଛି।
ସୂଚନାଯୋଗ୍ୟ, ଅନେକ ଦାୟିତ୍ୱ ତୁଲାଉଥିବା ଜେପି ନଡ୍ଡା ହିମାଚଳ ପ୍ରଦେଶରୁ ୨୦୧୨ ରେ ପ୍ରଥମ ଥର ପାଇଁ ରାଜ୍ୟସଭାକୁ ନିର୍ବାଚିତ ହୋଇଥିଲେ। ଦୁଇ ବର୍ଷ ପରେ, ଅର୍ଥାତ୍ ୨୦୧୪ ରେ, ତାଙ୍କୁ ବିଜେପିର ସଂସଦୀୟ ବୋର୍ଡର ସଦସ୍ୟ କରାଯାଇଥିଲା।
Union Minister and BJP National President JP Nadda has been appointed as the Leader of the House of the Rajya Sabha.
(File Photo) pic.twitter.com/nd8f5BtUu4
— ANI (@ANI) June 24, 2024
ଜେପି ନଡ୍ଡା ତାଙ୍କ ଛାତ୍ର ଦିନରେ ରାଜନୀତିରେ ପ୍ରବେଶ କରିଥିଲେ। ୧୯୭୭ ରୁ ୧୯୭୯ ମଧ୍ୟରେ ସେ ରାଞ୍ଚିରେ ଛାତ୍ର ରାଜନୀତିରେ ବହୁତ ସକ୍ରିୟ ଥିଲେ। ୧୯୭୫ ମସିହାରେ ଯେତେବେଳେ ସେ ବିହାର ଆନ୍ଦୋଳନର ଜଣେ କାର୍ଯ୍ୟକର୍ତ୍ତା ଭାବରେ କାର୍ଯ୍ୟ ଆରମ୍ଭ କରିଥିଲେ ସେତେବେଳେ ତାଙ୍କର ରାଜନୈତିକ କ୍ୟାରିୟର ଖବରରେ ରହିଥିଲା। ଏହି ଆନ୍ଦୋଳନକୁ ଜେପି ଆନ୍ଦୋଳନ ମଧ୍ୟ କୁହାଯାଏ। ଏହା ପରେ ସେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି)ରେ ଯୋଗ ଦେଇଥିଲେ। ୧୯୭୭ ମସିହାରେ ସେ ଏହାର ସଚିବ ଭାବରେ ନିର୍ବାଚିତ ହୋଇଥିଲେ।
ଏହା ବ୍ୟତୀତ ସେ ହିମାଚଳ ପ୍ରଦେଶର ବିଲାସପୁର ବିଧାନସଭା ଆସନରୁ ବିଧାୟକ ମଧ୍ୟ ରହିଛନ୍ତି। ୧୯୯୩ ରୁ ୨୦୦୭ ମଧ୍ୟରେ ସେ ଏହି ଆସନରୁ ତିନିଥର ବିଧାନସଭା ନିର୍ବାଚନରେ ଜିତିଥିଲେ। ସେ କେବେ ବି ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ନ ଥିଲେ। ସେ କେବଳ ରାଜ୍ୟସଭା ସାଂସଦ ଭାବରେ ସଂସଦରେ ପହଞ୍ଚିଥିଲେ। ଚଳିତ ବର୍ଷ ଏପ୍ରିଲରେ ସେ ଗୁଜୁରାଟରୁ ରାଜ୍ୟସଭା ସାଂସଦ ଭାବରେ ନିର୍ବାଚିତ ହୋଇଥିଲେ।
ସୂଚନାଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାରଙ୍କ ପ୍ରଥମ କାର୍ଯ୍ୟକାଳ ମଧ୍ୟରେ ମଧ୍ୟ ଜେପି ନଡ୍ଡାଙ୍କୁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ପଦ ଦିଆଯାଇଥିଲା।
[ad_2]
