[ad_1]
ନୂଆଦିଲ୍ଲୀ: ଲୋକସଭା ନିର୍ବାଚନରେ ଶକ୍ତିଶାଳୀ ବିଜେପିକୁ ଟକ୍କର ଦେବା ପାଇଁ ଗଠିତ ହୋଇଥିବା ଇଣ୍ଡିଆ ମେଣ୍ଟ ଏବେ ଶ୍ବାସରୁଦ୍ଧ ଅବସ୍ଥାର ସମ୍ମୁଖୀନ ହୋଇଛି। ଜେଡିୟୁ ନେତା ନୀତୀଶ କୁମାର ଲାଲୁ ଯାଦବଙ୍କ ନେତୃତ୍ୱାଧୀନ ଆର୍ଜେଡି ସହ ମେଣ୍ଟ ଭାଙ୍ଗି ଏନ୍ଡିଏକୁ ଫେରିବା ଇଣ୍ଡିଆ ମେଣ୍ଟ ପାଇଁ ଏକ ବଡ଼ ଧକ୍କା। ଗତବର୍ଷ ବିଜେପି ସରକାରଙ୍କ ବିରୋଧରେ ଆସିଥିବା ଅନାସ୍ଥା ପ୍ରସ୍ତାବ ଉପରେ ପ୍ରତିକ୍ରିୟା ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ ଯେ ବିରୋଧୀଙ୍କ ଇଣ୍ଡିଆ ମେଣ୍ଟ ଗୋଟିଏ ପରେ ଗୋଟିଏ ‘ନୋ ବଲ୍’ ମାରୁଛି। ପାଞ୍ଚମାସ ପରେ ବିହାରର ରାଜନୈତିକ ଗତିବିଧି ବିଜେପିକୁ ସମ୍ପୂର୍ଣ୍ଣ ଫାଇଦା ଦେଲା ବେଳେ ଇଣ୍ଡିଆ ମେଣ୍ଟ ପାଇଁ ଏକ ବଡ଼ ଝଟକା ସଦୃଶ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଆଞ୍ଚଳିକ ଶକ୍ତି ତୃଣମୂଳ କଂଗ୍ରେସ ଓ ଆମ୍ ଆଦମୀ ପାର୍ଟି ସହ ଆସନ ବୁଝାମଣା ପାଇଁ ବିରୋଧୀ ମେଣ୍ଟ ମଧ୍ୟରେ ବିବାଦ ଲାଗି ରହିଥିବା ବେଳେ ବିହାର ବିପର୍ଯ୍ୟୟ ଘଟିଛି। ଆସନ ବୁଝାମଣା ମଧ୍ୟରେ ତୃଣମୂଳ ସୁପ୍ରିମୋ ମମତା ବାନାର୍ଜୀ କଂଗ୍ରେସକୁ ଟାର୍ଗେଟ କରିବା ସହ ରାଜ୍ୟରେ ଇଣ୍ଡିଆ ମେଣ୍ଟରୁ ଏକ ପ୍ରକାର ଓହରିଯାଇଛନ୍ତି। ସେ କହିଛନ୍ତି ଯେ ପଶ୍ଚିମବଙ୍ଗରେ ତୃଣମୂଳ ଏକାକୀ ଲଢ଼ିବ ଏବଂ ନିର୍ବାଚନ ପରେ ହିଁ କୌଣସି ମେଣ୍ଟ ଉପରେ ନିଷ୍ପତ୍ତି ନିଆଯିବ। ପଞ୍ଜାବରେ ମଧ୍ୟ ଆସନ ବୁଝାମଣା ଆଲୋଚନା ବାଧାପ୍ରାପ୍ତ ହୋଇଛି, ଯେଉଁଠାରେ ମୁଖ୍ୟମନ୍ତ୍ରୀ ଭଗୱନ୍ତ ମାନ୍ କହିଛନ୍ତି ଯେ ଆପ୍ ଏକାକୀ ଲଢ଼େଇ ପାଇଁ ପ୍ରସ୍ତୁତ ହେଉଛି। ଏହି ପରିପ୍ରେକ୍ଷୀରେ ବିହାର ଘଟଣା ବିଜେପି ପାଇଁ ସମ୍ପୂର୍ଣ୍ଣ ଫାଇଦା ହିଁ ଫାଇଦା। ଗତକାଲି ପର୍ଯ୍ୟନ୍ତ ବିହାର ଏକ ବିରୋଧୀ ଶାସିତ ରାଜ୍ୟ ଥିଲା। ବିହାରରେ ପ୍ରାୟ ୪୦ଟି ଲୋକସଭା ଆସନ ଥିବାରୁ ଏହା ରାଜନୈତିକ ଦୃଷ୍ଟିରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସେଥିପାଇଁ ବିଜେପି ପଲ୍ଟୁରାମ ଚରିତ୍ର ପାଇଁ ବଦନାମ ନୀତୀଶ କୁମାରଙ୍କୁ ଏନ୍ଡିଏରେ ପୁନର୍ବାର ସାମିଲ କରିଛି।
ନୀତୀଶଙ୍କ ଘନିଷ୍ଠ ସହଯୋଗୀ ତଥା ଜେଡିୟୁର ବରିଷ୍ଠ ନେତା କେସି ତ୍ୟାଗୀ କଂଗ୍ରେସକୁ ତୀବ୍ର ସମାଲୋଚନା କରିଛନ୍ତି। ସର୍ବପୁରାତନ ଦଳ ଇଣ୍ଡିଆ ମେଣ୍ଟକୁ ହାଇଜାକ୍ କରିନେବାକୁ ଉଦ୍ୟମ କରୁଛି ବୋଲି ସେ ଅଭିଯୋଗ କରିଛନ୍ତି। ବିରୋଧୀ ଦଳକୁ ଏକାଠି କରିବା ପାଇଁ ନୀତୀଶ ଅଗ୍ରଣୀ ଥିବା ସତ୍ତ୍ୱେ ଏହା ଜେଡିୟୁକୁ ମେଣ୍ଟ ଛାଡ଼ିବାକୁ ବାଧ୍ୟ କରିଛି ବୋଲି ସେ କହିଛନ୍ତି। ତ୍ୟାଗୀ କହିଛନ୍ତି ଯେ, ବିଜେପିର ଶକ୍ତିଶାଳୀ ନିର୍ବାଚନ ବ୍ୟବସ୍ଥାର ମୁକାବିଲା ପାଇଁ ଯେଭଳି ପ୍ରସ୍ତୁତି ଆବଶ୍ୟକ ତାହା ଲୋକସଭା ନିର୍ବାଚନ ପୂର୍ବରୁ ଦେଖିବାକୁ ମିଳିନାହିଁ। କଂଗ୍ରେସ ନିଜ ଗଡ଼ରେ ସହଯୋଗୀ ଦଳଗୁଡ଼ିକୁ ଲଢ଼ିବାକୁ ଅନୁମତି ଦେବାକୁ ପ୍ରସ୍ତୁତ ନ ଥିବା ବେଳେ ଅନ୍ୟ ବିରୋଧୀ ଦଳ ଅଧ୍ୟୁଷିତ ରାଜ୍ୟଗୁଡ଼ିକରେ ଅଧିକ ଆସନ ପାଇଁ ଚାପ ପକାଉଛି। କଂଗ୍ରେସ ନିଜର ବଞ୍ଚିବା ପାଇଁ ଲଢ଼େଇ କରୁଛି ଏବଂ ଏହା ଆଞ୍ଚଳିକ ଶକ୍ତିକୁ ସମାପ୍ତ କରିବାକୁ ଚାହୁଛି ବୋଲି ତ୍ୟାଗୀ କହିଛନ୍ତି। ବର୍ତ୍ତମାନ ଜେଡିୟୁ ଇଣ୍ଡିଆ ମେଣ୍ଟ ଛାଡ଼ିବା କଂଗ୍ରେସକୁ ପୂରା ବ୍ୟାକ୍ଫୁଟକୁ ଠେଲି ଦେବ କାରଣ ଆଞ୍ଚଳିକ ଦଳଗୁଡ଼ିକ ଆସନ ବୁଝାମଣାରେ କଠୋର ବୁଝାମଣା କରିବା ପାଇଁ ବିହାର ଘଟଣାକୁ ବ୍ୟବହାର କରିବା ସମ୍ଭାବନା ରହିଛି। ଅନ୍ୟ ଆଞ୍ଚଳିକ ଦଳଗୁଡ଼ିକ ମଧ୍ୟ କଂଗ୍ରେସ ସହ ମେଣ୍ଟରୁ ଓହରିଯିବେ ବୋଲି ପୂର୍ବାନୁମାନ କରି ତ୍ୟାଗୀ କହିଛନ୍ତି, କଂଗ୍ରେସର ଅହଙ୍କାର ଯୋଗୁଁ ମେଣ୍ଟ ଶେଷ ହୋଇଛି।
[ad_2]
