[ad_1]
୭ ବିଧାୟକଙ୍କୁ ଦଳ ଛାଡିବାକୁ ୨୫ କୋଟି ଟଙ୍କା ଯଚାଯାଇଛି
ନୂଆଦିଲ୍ଲୀ: ବିଜେପି ଦିଲ୍ଲୀରେ ଆମ୍ ଆଦମୀ ପାର୍ଟି (ଆପ୍) ସରକାରକୁ ଭାଙ୍ଗିବାକୁ ଷଡ଼୍ଯନ୍ତ୍ର କରୁଛି ବୋଲି ଆପ୍ ମୁଖ୍ୟ ତଥା ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଦାବି କରିଛନ୍ତି। କେଜ୍ରିୱାଲଙ୍କ ଅଭିଯୋଗ ଅନୁସାରେ, ବିଜେପି ଆପ୍ର ୭ ଜଣ ବିଧାୟକଙ୍କୁ ଦଳ ଛାଡ଼ିବା ପାଇଁ ୨୫ କୋଟି ଟଙ୍କା ଲେଖାଏଁ ଯାଚିଥିଲା। ଦିଲ୍ଲୀ ବିଜେପି ଏହି ଅଭିଯୋଗକୁ ଖଣ୍ଡନ କରିବା ସହ କହିଛି ଯେ ସେମାନେ ସମ୍ପୃକ୍ତ ବିଧାୟକ ଏବଂ ଯେଉଁ ବ୍ୟକ୍ତିମାନେ ଏହି ପ୍ରସ୍ତାବ ନେଇ ସେମାନଙ୍କ ପାଖକୁ ଆସିଥିଲେ ସେମାନଙ୍କ ନାମ ପ୍ରକାଶ କରନ୍ତୁ।
Sambad is now on WhatsApp
Join and get latest news updates delivered to you via WhatsApp
କେଜ୍ରିୱାଲ ସୋସିଆଲ ମିଡିଆରେ ପୋଷ୍ଟ କରିଛନ୍ତି ଯେ, ତାଙ୍କ ଦଳର ୭ ଜଣ ବିଧାୟକଙ୍କୁ ଅଜ୍ଞାତ ବ୍ୟକ୍ତିମାନେ ଯୋଗାଯୋଗ କରିଛନ୍ତି ଏବଂ ଚେତାବନୀ ଦେଇଛନ୍ତି ଯେ ଆପ୍ ଆବାହକ ଭାବରେ ତାଙ୍କୁ ଖୁବ୍ଶୀଘ୍ର ଗିରଫ କରାଯିବ। କେଜ୍ରିୱାଲଙ୍କ କହିବା ଅନୁଯାୟୀ, ଫୋନ୍ କରିଥିବା ବ୍ୟକ୍ତିମାନେ ଆପ୍ର ୨୧ ଜଣ ବିଧାୟକଙ୍କ ସହ ସଂପର୍କରେ ଥିବା ଦାବି କରିଥିଲେ ଏବଂ ଦିଲ୍ଲୀ ସରକାର ଭାଙ୍ଗିବା ପରେ ନିର୍ବାଚନ ଲଢ଼ିବା ପାଇଁ ବିଜେପି ଟିକେଟ୍ ସହିତ ସେମାନଙ୍କୁ ୨୫ କୋଟି ଟଙ୍କା ଲେଖାଏଁ ଦେବାକୁ ପ୍ରତିଶ୍ରୁତି ଦେଇଥିଲେ। କେଜ୍ରିୱାଲ କହିଛନ୍ତି ଯେ ଆପ୍ର ସମସ୍ତ ସାତ ଜଣ ବିଧାୟକ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛନ୍ତି ଏବଂ କହିଛନ୍ତି ଯେ ଦିଲ୍ଲୀରେ ଆପ୍ ସରକାରକୁ ଅସ୍ଥିର କରିବା ପାଇଁ ମଦ ଦୁର୍ନୀତି ମାମଲାରେ ତାଙ୍କୁ ଗିରଫ କରିବାକୁ ଚେଷ୍ଟା କରାଯାଉଛି।
ଏକ ସାମ୍ବାଦିକ ସମ୍ମିଳନୀରେ ଦିଲ୍ଲୀ ମନ୍ତ୍ରୀ ଆତିଶୀ ଅଭିଯୋଗ କରିଛନ୍ତି ଯେ ବିଜେପି ଦିଲ୍ଲୀରେ ‘ଅପରେସନ୍ ଲୋଟସ୍ ୨.୦’ ଆରମ୍ଭ କରିଛି ଏବଂ ଆପ୍ ବିଧାୟକମାନଙ୍କୁ ଟଙ୍କା ଲୋଭ ଦେଖାଇବାର ସମାନ ପ୍ରୟାସ ଗତବର୍ଷ ବିଫଳ ହୋଇଥିଲା। ଏହି ଅଭିଯୋଗକୁ ଖଣ୍ଡନ କରି ଦିଲ୍ଲୀ ବିଜେପି ସମ୍ପାଦକ ହରିଶ ଖୁରାନା ଆତିଶୀଙ୍କୁ ଆହ୍ୱାନ ଦେଇ କହିଛନ୍ତି, ସେମାନେ ସମ୍ପୃକ୍ତ ବିଧାୟକ ଏବଂ ଅଫର ଦେଉଥିବା ଲୋକମାନଙ୍କ ନାମ ପ୍ରକାଶ କରନ୍ତୁ। ମଦ ଦୁର୍ନୀତି ମାମଲାରେ କେଜ୍ରିୱାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ସମନରୁ ଧ୍ୟାନ ହଟାଇବାକୁ ଆପ୍ ଚେଷ୍ଟା କରୁଛି ବୋଲି ସେ ଅଭିଯୋଗ କରିଛନ୍ତି।
[ad_2]
