ମୁମ୍ବାଇ: ପାଖେଇ ଆସୁଛି ମହାରାଷ୍ଟ୍ର ନିର୍ବାଚନ। ହେଲେ ନିର୍ବାଚନ ପୂର୍ବରୁ ବିଜେପିର ବଡ଼ କାର୍ଯ୍ୟାନୁଷ୍ଠାନ। ୩୭ଟି ଆସନରେ ବିଦ୍ରୋହ କରିଥିବା ୪୦ବିଦ୍ରୋହୀଙ୍କ ବିରୋଧରେ ବିଜେପି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବିଜେପି ଏହି ବିଦ୍ରୋହୀମାନଙ୍କୁ ଦଳରୁ ବହିଷ୍କାର କରିଛି।
ଏହାପୂର୍ବରୁ ଉଦ୍ଧବ ଠାକରେ ମଧ୍ୟ ଶିବସେନା-ୟୁବିଟି ବିଦ୍ରୋହୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ।
ଦଳ ବିରୋଧୀ କାର୍ଯ୍ୟକଳାପ ଯୋଗୁଁ ଉଦ୍ଧବ ଠାକରେ ୫ ନେତାଙ୍କୁ ବହିଷ୍କାର କରିଥିଲେ, ଯେଉଁଥିରେ ଭିଓ୍ୱଣ୍ଡିର ପୂର୍ବତନ ବିଧାୟକ ରୂପେଶ ମହାତ୍ରେ, ବିଶ୍ୱସ ନନ୍ଦେକର, ଚନ୍ଦ୍ରକାନ୍ତ ଘୁଗୁଲ, ସଞ୍ଜୟ ଆୱାରୀ ଏବଂ ପ୍ରସାଦ ଠାକରେ ସାମିଲ ଥିଲେ।
ସୂଚନା ଥାଉକି ସମସ୍ତ ଦଳ ବିଦ୍ରୋହୀମାନଙ୍କ ପ୍ରତି କଠୋର ମନୋଭାବ ଗ୍ରହଣ କରୁଛନ୍ତି। ମହାରାଷ୍ଟ୍ର ବିଧାନସଭା ନିର୍ବାଚନର ଦିନ ପାଖେଇ ଆସୁଥିବାରୁ ନେତାଙ୍କ ବିଦ୍ରୋହୀ ସ୍ୱର ମଧ୍ୟ ଉତ୍ତୋଳନ ହେବାରେ ଲାଗିଛି। ନିକଟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମହାୟୁତିଙ୍କ ନେତାମାନଙ୍କୁ ନିର୍ଦ୍ଦେଶ ଦେଇଛନ୍ତି ଯେ କୌଣସି ବିଦ୍ରୋହୀ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ଉଚିତ୍ ନୁହେଁ। ସେପଟେ ମହା ବିକାଶ ଆଘାଡିଙ୍କ ସହଯୋଗୀ ଶରଦ ପାୱାର ଏବଂ ଉଦ୍ଧବ ଠାକରେ ମଧ୍ୟ ବିଦ୍ରୋହୀମାନଙ୍କୁ ଚେତାବନୀ ଦେଇଛନ୍ତି।
ମହାରାଷ୍ଟ୍ରର ୨୮୮ ବିଧାନସଭା ଆସନ ପାଇଁ ୨୦ ନଭେମ୍ବରରେ ଭୋଟ୍ ହେବ। ନଭେମ୍ବର ୨୩ ରେ ଫଳାଫଳ ଘୋଷଣା କରାଯିବ। ଏଥର ବିଜେପି ସର୍ବାଧିକ ସଂଖ୍ୟକ ପ୍ରାର୍ଥୀ ମୈଦାନକୁ ଓହ୍ଲାଇଛି। ଦ୍ୱିତୀୟ ସ୍ଥାନରେ କଂଗ୍ରେସ ଏବଂ ତା’ପରେ ଉଦ୍ଧବ ଠାକରେଙ୍କ ନେତୃତ୍ୱଧିନ ଶିବସେନା ଅଛି। ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ନେତୃତ୍ୱରେ ଶିବସେନା ଚତୁର୍ଥ ସ୍ଥାନରେ ଏବଂ ଶେଷରେ ଡେପୁଟି ସିଏମ ଅଜିତ ପାୱାରଙ୍କ ଏନ୍ସିପି ପାର୍ଟି ଷଷ୍ଠ ସ୍ଥାନରେ ରହିଛି। ମହାରାଷ୍ଟ୍ରରେ ସମୁଦାୟ ୨୮୮ଟି ବିଧାନସଭା ଆସନ ଅଛି, ସେଥିମଧ୍ୟରୁ ୧୪୫ଟି ସିଟ୍ ସଂଖ୍ୟାଗରିଷ୍ଠତା ପାଇଁ ଆବଶ୍ୟକ।
