ଦିଲ୍ଲୀରୁ ବିହାରର ସୁପୌଲ ଯାଉଥିବା ଏକ ଡବଲ୍ ଡେକର୍ ଯାତ୍ରୀବାହୀ ବସରେ ଗତ ରାତିରେ ନିଆଁ ଲାଗିଥିବା ସୂଚନା ରହିଛି । ଉତ୍ତର ପ୍ରଦେଶର ହାଥରସରେ ଏହି ଦୁର୍ଘଟଣା ଘଟିଛି । ଦୁର୍ଘଟଣା ସମୟରେ ବସର ଡ୍ରାଇଭର ଓ ହେଲପର୍ ଏବଂ ଯାତ୍ରୀମାନେ ଗାଡ଼ିରୁ ଡେଇଁ ନିଜର ଜୀବନ ବଞ୍ଚାଇଥିଲେ ।
ହାଥରସର ସାଦାବାଦ ଥାନା ଅଧୀନ ମିଢାବଲି ଗାଁ ନିକଟ ଯମୁନା ଏକ୍ସପ୍ରେସ୍ ୱେରେ ଦୁର୍ଘଟଣା ଘଟିଛି ।
ରାତି ପ୍ରାୟ ୮ଟାରେ ଦିଲ୍ଲୀର ୱଜିରାବାଦରୁ ଯାତ୍ରୀମାନଙ୍କୁ ଧରି ବସଟି ବିହାରର ସୁପୌଲ ଯାଉଥିଲା । ଏହି ସମୟରେ ବସରେ ହଠାତ୍ ନିଆଁ ଲାଗିଯାଇଥିଲା ।
ବସର ଛାତ ଉପରେ ରଖାଯାଇଥିବା ଜିନିଷ ଯୋଗୁ ନିଆଁ ଚାରିଆଡ଼େ ବ୍ୟାପିଯାଇଥିଲା । ନିଆଁ ଦେଖି ଯାତ୍ରୀମାନେ ଭୟରେ ଚିତ୍କାର କରିବାକୁ ଲାଗିଥିଲେ । ଏହି ସମୟ ମଧ୍ୟରେ ସେମାନେ ସଙ୍ଗେ ସଙ୍ଗେ ବସକୁ ଅଟକାଇଥିଲେ ଏବଂ ଗାଡ଼ିରୁ ଡେଇଁ ନିଜର ଜୀବନ ବଞ୍ଚାଇଥିଲେ ।
ଖବର ପାଇ ଅଗ୍ନିଶମ ଏବଂ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚିଥିଲା । ସୌଭାଗ୍ୟବଶତଃ, ସମସ୍ତ ଯାତ୍ରୀଙ୍କୁ ସମୟ ପୂର୍ବରୁ ଉଦ୍ଧାର କରି ନିଆଯାଇଥିଲା । ବହୁ ପରିଶ୍ରମ ପରେ ଦମକଳ ଗାଡ଼ି ନିଆଁକୁ ଆୟତ୍ତ କରିଥିଲା । ତେବେ ନିଆଁକୁ କାବୁ କଲା ବେଳକୁ ବସଟି ସମ୍ପୂର୍ଣ୍ଣ ଭାବରେ ଜଳି ସାରିଥିଲା ।
ଦୁର୍ଘଟଣା ପରେ ଯମୁନା ଏକ୍ସପ୍ରେସ୍ ୱେରେ କିଛି ସମୟ ଯାଏ ଟ୍ରାଫିକ୍ ଜାମ୍ ରହିଥିଲା ।
