ଆନନ୍ଦପୁର : କାର-ବାଇକ ଧକ୍କା ହେବ ଯୋଗୁ ଦୁଇ ଜଣ ଗୁରୁତର ଆହତ ହୋଇଛନ୍ତି । ଦୁର୍ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଛି । ଛେନାପଦି- ହଦଗଡ଼ ରାସ୍ତାର ଦୁଆରଶୁଣି ନିକଟରେ କାର ଓ ବାଇକ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଦୁଇ ବାଇକ ଆରୋହୀ ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି ।
ଠୁଣିଗାଁ ଗ୍ରାମର ଶ୍ରୀକାନ୍ତ ସାହୁ ଓ ଆର୍ତ୍ତ ନାଇକ ଛେନାପଦି ଛକରୁ ବାଇକ ଯୋଗେ ନିଜ ଗାଁକୁ ଫେରୁଥିବା ବେଳେ ମଠଡାହିର ଦୁଆରଶୁଣି ନିକଟରେ ବିଦ୍ୟାଧରପୁର ପଟୁ ଦ୍ରୁତଗତିରେ ଆସୁଥିବା ଏକ କାର ସେମାନଙ୍କୁ ଧକ୍କା ଦେଇ ପଳାଇ ଆସିଥିଲା ।
ଏଥିରେ ବାଇକ ଆରୋହୀ ଦୁଇ ଜଣ ଗୁରୁତର ହୋଇଥିଲେ ।
ସ୍ଥାନୀୟ ଲୋକମାନେ ଗୁରୁତର ଆହତ ଦ୍ବୟଙ୍କୁ ଉଦ୍ଧାର କରି ଅଗ୍ନିଶମ ବାହିନୀ ସହାୟତାରେ ଆନନ୍ଦପୁର ଡାକ୍ତରଖାନାକୁ ପଠାଇଥିଲେ । ଦୁର୍ଘଟଣା ଘଟାଇ କାରଟି ଦ୍ରୁତ ଗତିରେ ପଳାଇ ଆସୁଥିବା ବେଳେ ଛେନାପଦି ଛକ ନିକଟରେ ଲୋକମାନେ ଅଟକାଇ ପୁଲିସକୁ ଡାକି ହସ୍ତାନ୍ତର କରିଛନ୍ତି । ଉଭୟଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବାରୁ କଟକ ସ୍ଥାନାନ୍ତର କରାଯାଇଛି ।
