[ad_1]
ନୂଆଦିଲ୍ଲୀ: ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନ୍ୟୁ) ଛାତ୍ର ସଂସଦର ପୂର୍ବତନ ସଭାପତି ତଥା ଏବେ କଂଗ୍ରେସର ପ୍ରମୁଖ ନେତା କହ୍ନେୟା କୁମାର ବିହାରର ବେଗୁସରାଇ ଆସନରୁ ୨୦୨୪ ଲୋକସଭା ନିର୍ବାଚନ ଲଢ଼ିବେ ନାହିଁ। ବିରୋଧୀ ମେଣ୍ଟର ପ୍ରମୁଖ ସହଯୋଗୀ ତଥା ଭାରତୀୟ କମ୍ୟୁନିଷ୍ଟ ପାର୍ଟି (ସିପିଆଇ) ବେଗୁସରାଇ ଆସନ କଂଗ୍ରେସ ପାଇଁ ଛାଡ଼ିବାକୁ ମନା କରିଦେଇଛି।
Sambad is now on WhatsApp
Join and get latest news updates delivered to you via WhatsApp
ବେଗୁସରାଇରୁ କହ୍ନେୟା କୁମାରଙ୍କୁ ପ୍ରାର୍ଥୀ କରିବାକୁ ଚାହୁଁଥିବାରୁ ଏହା କଂଗ୍ରେସ ପାଇଁ ଏକ ଝଟକା। ସିପିଆଇ ଅବଦେଶ ରାୟଙ୍କୁ ବେଗୁସରାଇରୁ ନିର୍ବାଚନ ଲଢ଼ିବା ପାଇଁ ଟିକେଟ୍ ଦେଇଛି। ରାୟ ଦଳର ପୂର୍ବତନ ବିଧାୟକ ତଥା ଦଳର ଜିଲ୍ଲା ୟୁନିଟ୍ ସମ୍ପାଦକ ଏବଂ ସେଠାକାର ରାଜନୀତିରେ ଜଣେ ଜଣାଶୁଣା ଚେହେରା।
ସିପିଆଇ ରାଜ୍ୟ ସମ୍ପାଦକ ରାମ ନରେଶ ପାଣ୍ଡେ କହିଛନ୍ତି ଯେ ଦଳ ଏହାର ପାରମ୍ପରିକ ଆସନ ବେଗୁସରାଇରୁ ନିର୍ବାଚନ ଲଢ଼ିବ।
ସିପିଆଇ ସୂତ୍ରରୁ ପ୍ରକାଶ ଯେ ତିନି ବର୍ଷ ତଳେ ଦଳ ଛାଡି କଂଗ୍ରେସରେ ଯୋଗ ଦେଇଥିବା କହ୍ନେୟା କୁମାରଙ୍କ ସହ ଦଳୀୟ ନେତାମାନେ ସହଜ ନୁହଁନ୍ତି। ୨୦୧୯ରେ ସିପିଆଇ ଯୁବ ନେତା କହ୍ନେୟା କୁମାର ବେଗୁସରାଇରୁ ଲୋକସଭା ନିର୍ବାଚନ ଲଢ଼ିଥିଲେ, କିନ୍ତୁ ଭାରତୀୟ ଜନତା ପାର୍ଟି (ବିଜେପି)ର ଗିରିରାଜ ସିଂହଙ୍କ ଠାରୁ ୪,୨୨,୨୧୭ଖଣ୍ଡ ଭୋଟରେ ପରାସ୍ତ ହୋଇଥିଲେ।
ରାଜନୈତିକ ସମୀକ୍ଷକମାନେ କହିଛନ୍ତି ଯେ ବେଗୁସରାଇକୁ କେବେ ବି କଂଗ୍ରେସର ଗଡ଼ ଭାବେ ବିବେଚନା କରାଯାଏ ନାହିଁ ଏବଂ ମହାମେଣ୍ଟର ଆସନ ବୁଝାମଣା ଫର୍ମୁଲାରେ ଦଳ ପାଇଁ ଏହି ଆସନ ପାଇବା କଷ୍ଟକର ଥିଲା।
କୁହାଯାଉଛି ଯେ ଅନ୍ୟ କେହି ନୁହଁନ୍ତି ବରଂ ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ବେଗୁସରାଇ ଆସନ ପାଇବାକୁ ଆଗ୍ରହୀ ଥିଲେ ଯାହା ଦ୍ୱାରା କହ୍ନେୟା କୁମାର ଏହି ଆସନରୁ ନିର୍ବାଚନ ଲଢ଼ିଥାନ୍ତେ। ବିଜେପି ଏପର୍ଯ୍ୟନ୍ତ ଏହି ନିର୍ବାଚନ ମଣ୍ଡଳୀରୁ ନିଜ ପ୍ରାର୍ଥୀଙ୍କ ନାମ ଘୋଷଣା କରିନାହିଁ କିନ୍ତୁ ହିନ୍ଦୁତ୍ୱ ରାଜନୀତିର ଚାମ୍ପିୟନ ବର୍ତ୍ତମାନର ସାଂସଦ ଗିରିରାଜ ସିଂହ ଏହି ଆସନର ଦାବୀଦାର ଭାବେ ସବୁଠାରୁ ଆଗରେ ଅଛନ୍ତି।
[ad_2]
