ବାଂଲାଦେଶରେ ସଂଖ୍ୟାଲଘୁ ହିନ୍ଦୁ ସମ୍ପ୍ରଦାୟର ଅତ୍ୟାଚାର ଏବଂ ଭାରତୀୟ ପତାକାକୁ ବିରୋଧ କରୁଥିବା ହେତୁ ଭାରତର ଅନେକ ରାଜ୍ୟରେ ବିରୋଧ ପ୍ରଦର୍ଶନ କରାଯାଉଛି। ନିକଟରେ ଅଗରତାଲା ଏବଂ କୋଲକାତାର ଡାକ୍ତରଖାନାଗୁଡ଼ିକ ବାଂଲାଦେଶୀ ନାଗରିକଙ୍କ ଚିକିତ୍ସା ପାଇଁ ମନା କରିଦେଇଥିଲେ। ଏହି ସମୟରେ ସୋମବାର ଦିନ ତ୍ରିପୁରା ହୋଟେଲ ଏବଂ ରେଷ୍ଟୁରାଣ୍ଟ ମଧ୍ୟ ଏକ ବଡ଼ ନିଷ୍ପତ୍ତି ନେଇଛନ୍ତି। ସେମାନେ ବର୍ତ୍ତମାନ ବାଂଲାଦେଶୀମାନଙ୍କୁ ସେବା ଯୋଗାଇବାକୁ ମନା କରି ଦେଇଛନ୍ତି।
ରାଜ୍ୟର ହୋଟେଲ ଏବଂ ରେଷ୍ଟୁରାଣ୍ଟର ଏକ ବୃହତ ବିଭାଗର ପ୍ରତିନିଧିତ୍ୱ କରୁଥିବା ‘ଅଲ୍ ତ୍ରିପୁରା ହୋଟେଲ ଏବଂ ରେଷ୍ଟୁରାଣ୍ଟ ମାଲିକ ସଂଘ’ ଦ୍ୱାରା ଏହି ନିଷ୍ପତ୍ତି ନିଆଯାଇଛି। ହିନ୍ଦୁ ସାଧୁ ଚିନ୍ମୟ କୃଷ୍ଣ ଦାସଙ୍କ ଗିରଫଦାରୀ ତଥା ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ଆକ୍ରମଣକୁ ନେଇ ତ୍ରିପୁରାର ରାଜଧାନୀ ଅଗରତାଲାରେ ବ୍ୟାପକ ବିରୋଧ ପ୍ରଦର୍ଶନ କରାଯାଉଥିବା ବେଳେ ଏହି ନିଷ୍ପତ୍ତି ଘୋଷଣା କରାଯାଇଥିଲା। କେବଳ ଏତିକି ନୁହେଁ କୋଲକାତାର ହୋଟେଲରେ ମଧ୍ୟ ଏହି ଆସୋସିଏସନ ଏହି ନିଷ୍ପତ୍ତି କାର୍ଯ୍ୟକାରୀ କରିଛି।
ହୋଟେଲ ମାଲିକ ସଂଘର ସଚିବ ଭାସ୍କର ଚକ୍ରବର୍ତ୍ତୀ କହିଛନ୍ତି ଯେ ଏହି ନିଷ୍ପତ୍ତିରେ ସମସ୍ତ ହୋଟେଲ ମାଲିକ ଏକଜୁଟ ହୋଇଛନ୍ତି ଏବଂ ବାଂଲାଦେଶୀ ନାଗରିକଙ୍କୁ ସେବା ପ୍ରଦାନ ନକରିବାର ଏହି ନିଷ୍ପତ୍ତି ଖୁବ ଶୀଘ୍ର କାର୍ଯ୍ୟକାରୀ ହେବ।
ତ୍ରିପୁରା ହୋଟେଲ ଆସୋସିଏସନର ଏହି ପଦକ୍ଷେପ ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ହେଉଥିବା ଆକ୍ରମଣ ତଥା ହିଂସାକୁ ନେଇ ଧ୍ୟାନର ଏକ ଅଂଶ ଭାବରେ ବିବେଚନା କରାଯାଉଛି। ତେବେ ଏହି ନିଷେଧାଦେଶ କେତେ ଦିନ ପର୍ଯ୍ୟନ୍ତ ଚାଲିବ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଆସୋସିଏସନ ଏହା ମଧ୍ୟ ସୂଚନା ଦେଇଛି ଯେ ଏହି ନିଷ୍ପତ୍ତି ପରେ ପଶ୍ଚିମବଙ୍ଗରେ ଅବସ୍ଥିତ ହୋଟେଲ ଏବଂ ରେଷ୍ଟୁରାଣ୍ଟ ଆସୋସିଏସନ ମଧ୍ୟ ବାଂଲାଦେଶୀ ନାଗରିକଙ୍କୁ ସେବା ଯୋଗାଇ ନଦେବାକୁ ବୈଠକ ପରେ ନିଷ୍ପତ୍ତି ନେଇଛି।
